راجستھان میں موسلادھار بارش نے تباہی مچا ئی، تمام اضلاع میں دو دن کے لئے اسکول بند رہیں گے

راجستھان میں موسلادھار بارش نے تباہی مچا دی ہے۔ گزشتہ چوبیس گھنٹوں کے دوران ریاست کے مختلف حصوں میں تیز  موسلادھار بارش جاری رہی، جس میں دوسہ میں سب سے زیادہ 29 سینٹی میٹر بارش ریکارڈ کی گئی۔ صورتحال یہ ہے کہ آج25 اگست کو تمام اضلاع میں اسکول بند رکھنے کے احکامات جاری کردیئے گئے ہیں۔ درحقیقت راجستھان کے بنڈی، سوائی مادھوپور اور کوٹا اضلاع کے کئی علاقوں میں سیلاب جیسی صورتحال پیدا ہوگئی ہے۔

23 اگست کو جے پور، بھرت پور، بیکانیر اور اجمیر ڈویژن کے کچھ حصوں میں موسلادھار سے بہت زیادہ بارش ہونے کی توقع ہے۔ ساتھ ہی ریاستی دارالحکومت جے پور مسلسل دوسرے دن بھی بارش کی لپیٹ میں ہے، جس کی وجہ سے کئی علاقے پانی میں ڈوب گئے ہیں۔ شہر کے کئی علاقوں میں سڑکیں ڈوب گئیں۔

موسلادھار بارش کی پیشن گوئی کے پیش نظر ضلع کلکٹر نے تمام سرکاری اور نجی اسکولوں کو آج اور کل کو بند رکھنے کا حکم دیا ہے۔ یہاں برکت نگر، ٹونک پھاٹک وغیرہ جیسے علاقوں کو ہفتہ کی رات کئی بار بجلی کی بندش کا سامنا کرنا پڑا اور اسے بحال کرنے میں تکنیکی ٹیم کو تقریباً سات گھنٹے لگے۔

اس کے علاوہ جے پور ڈیولپمنٹ اتھارٹی نے دو پارکس، کشن باغ اور سورن جینتی پارک، جو ودیادھر نگر کے قریب واقع ہیں، کو آج سے بدھ تک عام لوگوں کے لیے بند کرنے کا فیصلہ کیا ہے۔ پانی بھر جانے کی وجہ سے پارکس کے کیچڑ والے علاقوں میں تبدیل ہونے کے بعد یہ فیصلہ کیا گیا۔

کوٹہ، بنڈی اور سوائی مادھوپور اضلاع کے کئی علاقوں میں سیلاب جیسی صورتحال ہے۔ امدادی ٹیموں نے متاثرہ علاقوں سے لوگوں کو نکال لیا ہے۔ ادے پور میں ہفتہ کی دیر رات مہارانا بھوپال سنگھ اسپتال کے ایک حصے میں پانی داخل ہوگیا۔ محکمہ موسمیات نے اگلے تین چار دنوں تک ریاست کے کچھ حصوں میں موسلا دھار بارش جاری رہنے کی پیشن گوئی کی ہے۔ آنے والے دنوں میں یہاں کے کئی اضلاع میں موسلادھار بارش ہو سکتی ہے۔