کیسے غائب ہو گئے 31 پہاڑ، لوگ ہنومان ہو گئے کیا؟ سپریم کورٹ کا سوال

سپریم کورٹ نے راجستھان میں اراولی کی پہاڑیوں پر اندھا دھند چل رہی کانکنی پر سخت رُخ اختیار کرتے ہوئے اپنی ناراضگی کا اظہار کیا ہے اور حکومت سے 48 گھنٹوں کے اندر تمام کھدانوں اور کانکنی کو روکنے کا حکم دیا ہے اور اگلے پیر تک حکم کی تعمیل کی رپورٹ پیش کرنے کو کہا ہے۔

سپریم کورٹ میں سماعت کے دوران جسٹس مدن بی لوکر نے کہا کہ رپورٹ کے مطابق دہلی، راجستھان اور ہریانہ کی سرحد وں سے 31 پہاڑ کیسے غائب ہو گئے ہیں۔ لوگوں میں ہنومان جیسی طاقت تو نہیں آ سکتی کہ وہ پہاڑ کو اٹھا لے جائیں ۔ ایسے میں یہ صاف ہو جاتا کہ اس علاقے میں غیر قانونی کان کنی کی جارہی ہے، ۔ عدالت عظمیٰ کے پوچھنے پر راجستھان حکومت نے بھی اعتراف کیا ہے کہ اراولی میں 115.34 ہیکٹیئر زمین پر کان کنی کی گئی ہے۔

عدالت عظمی نے اس رد عمل پر کہا کہ آپ (راجستھان حکومت) اسٹاف کی کمی کا بہانہ بناکر خود کچھ نہیں کرتے اور مرکزی حکومت کچھ کرتی ہے تو آپ کو دقت ہوتی ہے۔ عدالت نے کہا کہ پہاڑ ہمارے فطری محافظ ہیں۔ وہ راجستھان کے صحرا کی ریت یا آلودگی کو دہلی آنے سے روکتے ہیں لیکن آپ نے سالانہ ساڑھے پانچ ہزار کروڑ رائلٹی کے چکر میں دہلی این سی آر کے لاکھوں لوگوں کی جان خطرے میں ڈال دی۔ آپ پر اس کا کوئی اثر بھی نظر نہیں آتا۔

سپریم کورٹ کے رخ پر اپنے رد عمل کا اظہار کرتے ہوئے راجستھان کے سابق وزیر اعلیٰ اشوک گہلوت نے ٹوئٹ میں لکھا کہ یہ تشویش کا موضوع ہے کہ سپریم کورٹ نے راجستھان حکومت سے 48 گھنٹوں کے اندر غیرقانونی کان کنی روکنے کی ہدایت دی ہے، سپریم کورٹ کا تبصرہ ہے کہ وہ حکم جاری کرنے کے لئے مجبور ہیں کیوں کہ راجستھان حکومت نے اس ایشو کو ہلکے میں لیا ہوا ہے۔

گہلوت نے مزید کہا کہ حکومت غیر قانونی کانکنی روکنے میں پوری طرح سے ناکام رہی ہے۔ ریاست میں پہاڑیوں کا غائب ہونا خطرناک صورت حال ہے۔ میں لگاتار کہتا رہا ہوں کہ ریت مافیہ، کانکنی مافیہ کا نیٹورک بڑی بدعنوانی کی وجہ سے فعال ہے۔ انہیں سیاسی پشت پنائی ہے اور اس کا پیسہ اوپر تک پہنچ رہا ہے۔