سنبھل: کانوڑ یاترا اور تعزیہ کے متعلق چندوسی سرکل افسر انوج چودھری کا نیا فرمان جاری

اپنے بیانوں اور فیصلوں سے سرخیوں میں رہنے والے چندوسی کے سرکل افسر انوج چودھری کا تعزیہ اور کانوڑ یاترا کے متعلق ایک نیا فرمان سامنے آیا ہے۔ اس بار انہوں نے مسلمانوں کے ساتھ ساتھ ہندوؤں کے لیے بھی گائیڈ لائن جاری کیا ہے۔ نئے فرمان میں سی او چندوسی انوج چودھری نے کہا کہ اس بار محرم پر کوئی درخت نہیں کاٹا جائے گا اور نہ ہی بجلی کی تار کاٹی یا ہٹائی جائے گی۔ ساتھ ہی انہوں نے کہا کہ کانوڑ یاترا میں ڈی جے کی آواز بھی مقررہ حد سے زائد نہ ہو۔ اگر گائیڈ لائن پر عمل نہیں کیا گیا تو سخت کارروائی ہو سکتی ہے۔

واضح ہو کہ محرم اور ساون کے ماہ میں ہونے والے کانوڑ یاترا اور گنیش چترتھی کے تیوہار کو دیکھتے ہوئے چندوسی کوتوالی میں امن کمیٹی کا اجلاس منعقد ہوا۔ اس میٹنگ میں تمام افسران کے ساتھ سی او انوج چودھری بھی نے شرکت کی۔ میٹنگ کے بعد گائیڈ لائن جاری کرتے ہوئے انوج چودھری نے کہا کہ ’’تعزیہ کی اونچائی 10 فٹ سے زیادہ نہیں ہونی چاہیے۔ محرم پر نہ تو کوئی درخت کاٹا جائے گا اور نہ ہی بجلی کی لائن میں خلل ڈالا جائے گا۔ کانوڑ یاترا میں ڈی جے والوں کو بھی مقررہ حد پر ہی گانے بجانے کی اجازت ہوگی۔‘‘

انوج چودھری نے یہ بھی کہا کہ جو شخص پہلے سے تعزیہ نکالتا آیا ہے وہی شخص تعزیہ نکالے گا۔ اگر کسی وجہ سے وہ تعزیہ نہیں نکال پاتا ہے تو اس کی جگہ کوئی دوسرا شخص تعزیہ نہیں نکالے گا۔ ساتھ ہی سنبھل کے ایس ڈی ایم ڈاکٹر راجیندر پنسیا نے محرم کے جلوس کو لیکر لوگوں سے ان کے مسائل پر بات کی اور راستے وغیرہ کو صحیح کرنے کا حکم دیا، تاکہ وہاں سے گزرنے والے لوگوں کو کسی بھی قسم کے مسائل کا سامنا نہ کرنا پڑے۔