دہلی میں گرمی سے راحت، 24 گھنٹوں میں درجہ حرارت میں 3 ڈگری کی گراوٹ

محکمہ موسمیات کے مطابق آج  صبح آسمان پر ہلکی دھند چھائی رہی۔ دن کے وقت موسم جزوی طور پر ابر آلود رہنے کا امکان ہے۔ گرد آلود ہواؤں کی وجہ سے آلودگی کی سطح بڑھ سکتی ہے۔محکمہ موسمیات نے 31 مارچ تک دہلی میں تیز ہوائیں چلنے کی پیش گوئی کی ہے۔ اس کے علاوہ اتوار کو دہلی میں زیادہ سے زیادہ اور کم سے کم درجہ حرارت بالترتیب 32 اور 16 ڈگری سیلسیس رہنے کا امکان ہے۔

محکمہ موسمیات  کے مطابق دہلی میں یکم اپریل سے گرمی بڑھنے کا امکان ہے۔ دہلی میں 4 اپریل تک درجہ حرارت 40 ڈگری تک بڑھنے کی پیش گوئی کی گئی ہے۔ محکمہ موسمیات نے درجہ حرارت میں اتار چڑھاؤ کو مدنظر رکھتے ہوئے لوگوں سے محتاط رہنے کی اپیل کی ہے۔

دہلی میں ہفتہ کو زیادہ سے زیادہ درجہ حرارت 29.6 ڈگری سیلسیس ریکارڈ کیا گیا جو اس موسم کے اوسط درجہ حرارت سے تین ڈگری کم ہے۔ محکمہ موسمیات نے کہا کہ دہلی میں کم سے کم درجہ حرارت 15.5 ڈگری سیلسیس ریکارڈ کیا گیا جو اس موسم کے اوسط درجہ حرارت سے 2.6 ڈگری کم ہے۔ ہفتہ کو دہلی میں نمی کی سطح دن کے وقت 34 سے 23 فیصد کے درمیان رہی۔

جمعہ یعنی28 مارچ کی شام کو دہلی میں تیز ہوائیں چلیں اور زیادہ سے زیادہ درجہ حرارت 32.3 ڈگری سیلسیس ریکارڈ کیا گیا جو معمول سے 4.1 ڈگری سیلسیس کم ہے۔ جمعہ کو دہلی میں کم سے کم درجہ حرارت 20.9 ڈگری سیلسیس ریکارڈ کیا گیا جو معمول سے 2.8 ڈگری زیادہ ہے۔ آئی ایم ڈی نے کہا کہ دن کے دوران نمی کی سطح 17 فیصد اور 51 فیصد کے درمیان تھی۔