کرناٹک میں او بی سی ریزرویشن 32 فیصد سے بڑھا کر 51 فیصد کرنے کی سفارش، مردم شماری کمیشن کی رپورٹ پیش

 کرناٹک میں ذات پر مبنی مردم شماری  کمیشن نے ریاست میں دیگر پسماندہ طبقہ (او بی سی) کے لیے ریزرویشن کو 32 فیصد سے بڑھا کر 51 فیصد کرنے کی سفارش کی ہے۔ اگر یہ سفارش نافذ ہو جاتی ہے تو ریاست میں کُل ریزرویشن کا اعداد و شمار 85 فیصد تک پہنچ جائے گا۔ اس میں 10 فیصد اقتصادی طور پر کمزور طبقہ (ای ڈبلیو ایس) اور 24 فیصد درج فہرست ذات/ درج فہرست قبائل (ایس سی/ایس ٹی) کے لیے پہلے سے محفوظ ہیں۔

کمیشن کی تجویز حال ہی میں کرائے گئے سماجی-اقتصادی اور تعلیمی جائزہ (ذات پر مبنی مردم شماری) کے نتائج پر مبنی ہے، جس میں ریاست میں پسماندہ طبقوں کی آبادی تقریباً 70 فیصد ہونے کا اندازہ لگایا گیا ہے۔ اس ڈاٹا کا حوالہ دیتے ہوئے رپورٹ میں منطق دی گئی ہے کہ سرکاری فائدہ اور مواقع کے یکساں تقسیم کے لیے آبادی کے تناسب میں ریزرویشن بڑھانا ضروری ہے۔

کمیشن نے اپنی سفارش میں کہا ہے کہ پسماندہ طبقوں کی آبادی میں 69.6 فیصد کا اضافہ ہوا ہے لیکن حال میں کمیشن نے پایا کہ کرناٹک میں او بی سی کی آدھی آبادی کو بھی ریزرویشن نہیں ملا ہے۔ اگر پسماندہ طبقوں کو آبادی کی بنیاد پر ریزرویشن نہیں دیا جاتا ہے تو سرکاری سہولیات یکساں طور سے تقسیم نہیں ہوں گی۔

ذرائع کے مطابق جائزہ رپورٹ کے مطابق 1 اے زمرے میں پسماندہ طبقوں کی آبادی 34,96,638، 1 بی- 73,92,313، 2 اے- 77,78,209، 2 بی- 75,25,880، 3 اے- 72,99,577 اور 3 بی زمرے میں پسماندہ طبقوں کی آبادی 1,54,37,113 ہے۔ ذرائع نے بتایا کہ اس طرح سے دیگر پسماندہ ذاتوں کی کُل آبادی 4,16,30,153 ہے۔ رپورٹ کا حوالہ دیتے ہوئے ذرائع نے دعویٰ کیا کہ درج فہرست ذات اور درج فہرست قبائل کی آبادی بالترتیب 1,09,29347 اور 42,81,289 ہے۔

معلوم ہو کہ جائزہ کی شروعات 2015 میں ایچ کنتھ راج کے ذریعہ کی گئی تھی اور بعد میں کرناٹک ریاستی پسماندہ طبقہ کمیشن کے چیئرمین کے جئے پرکاش ہیگڑے نے اسے پورا کیا اور فروری 2024 میں وزیر اعلیٰ سدھارمیا کو رپورٹ سونپی۔

کمیشن نے سفارش کی ہے کہ ریاستی حکومت نوکری اور تعلیم میں افقی ریزرویشن (Horizontal Reservation) کو بھی نافذ کرے۔ اس پالیسی کے تحت خواتین، معذور اور دیگر خاص طبقوں کو ہر محفوظ زمرہ کے اندر الگ کوٹہ ملتا ہے۔ مثال کے طور پر او بی سی طبقہ میں خواتین یا معذوروں کے لیے الگ سے ریزرویشن یقینی کیا جائے گا۔

ذات پر مبنی مردم شماری کی یہ رپورٹ فروری 2024 میں حکومت کو سونپی گئی تھی، جسے جمعہ کو سدھارمیا کابینہ کے سامنے پیش کیا گیا۔ حکومت اب اس رپورٹ پر بحث کے لیے 17 اپریل کو خصوصی کابینہ کی میٹنگ منعقد کرے گی، جس کے بعد سفارشات کو نافذ کرنے پر حتمی فیصلہ لیا جائے گا۔