ایران-اسرائیل کشیدگی: وزیر اعظم مودی کا متحدہ عرب امارات سے اظہارِ یکجہتی اور نیتن یاہو سے رابطہ

ایران اور اسرائیل کے درمیان جاری کشیدگی کے پیش نظر ہندوستان نے اعلیٰ سطحی سفارتی رابطوں میں تیزی لا دی ہے۔ وزیر اعظم نریندر مودی نے دیر رات متحدہ عرب امارات کے صدر شیخ محمد بن زاید النہیان اور اسرائیلی وزیر اعظم بنجامن نیتن یاہو سے ٹیلی فون پر گفتگو کی اور خطے کی موجودہ صورتحال پر تبادلہ خیال کیا۔

وزیر اعظم نے متحدہ عرب امارات پر حالیہ حملوں کی سخت الفاظ میں مذمت کی اور ان واقعات میں جان گنوانے والوں کے اہل خانہ سے تعزیت کا اظہار کیا۔ انہوں نے کہا کہ ہندوستان اس مشکل وقت میں متحدہ عرب امارات کے ساتھ مکمل یکجہتی کے ساتھ کھڑا ہے۔ وزیر اعظم نے امارات میں مقیم ہندوستانی برادری کی حفاظت یقینی بنانے پر وہاں کی قیادت کا شکریہ بھی ادا کیا اور واضح کیا کہ ہندوستان کشیدگی کم کرنے، علاقائی امن، سلامتی اور استحکام کی حمایت کرتا ہے۔

سرکاری معلومات کے مطابق گزشتہ دو دن کے دوران متحدہ عرب امارات میں ایرانی حملوں کے نتیجے میں تین افراد ہلاک جبکہ ایک ہندوستانی شہری سمیت 58 افراد زخمی ہوئے ہیں۔ ان واقعات کے بعد خلیجی خطے میں صورتحال مزید نازک ہو گئی ہے اور عالمی برادری کی تشویش میں اضافہ ہوا ہے۔

وزیر اعظم نریندر مودی نے اسرائیلی وزیر اعظم بنجامن نیتن یاہو سے گفتگو کے دوران حالیہ پیش رفت پر ہندوستان کی تشویش سے آگاہ کیا۔ انہوں نے زور دیا کہ عام شہریوں کی سلامتی کو اولین ترجیح دی جانی چاہیے۔ وزیر اعظم نے اس بات کو بھی دوہرایا کہ موجودہ حالات میں دشمنانہ کارروائیوں کے جلد خاتمے کی ضرورت ہے تاکہ خطے میں مزید عدم استحکام سے بچا جا سکے۔

نئی دہلی نے واضح کیا ہے کہ وہ خطے کی بدلتی صورتحال پر مسلسل نظر رکھے ہوئے ہے اور سفارتی ذرائع سے کشیدگی کم کرنے کی حمایت جاری رکھے گا۔ ہندوستان کا مؤقف ہے کہ علاقائی امن اور استحکام ہی موجودہ بحران کا واحد پائیدار حل ہے۔