ہری نگر کی رکن اسمبلی راج کماری ڈھلوں آزاد امیدوار کے طور پر انتخاب لڑیں گی، کیجریوال پرجم کر برسیں

اس بار راجدھانی دہلی کی انتخابی جنگ میں باغی امیدوار عام آدمی پارٹی کا کھیل خراب کرنے کی کوشش کر رہے ہیں۔ اسی سلسلے میں ہری نگر اسمبلی سیٹ سے موجودہ عام آدمی پارٹیکی رکن اسمبلی راج کماری ڈھلوں اپنا ٹکٹ کٹنے کے بعد آزاد امیدوار کی حیثیت سے انتخابی میدان میں اتری ہیں۔نیوز پورٹل ’اے بی پی‘ پر شائع خبر کے مطابق راج کماری ڈھلوں نے دہلی کے سابق وزیر اعلیٰ اور عام آدمی پارٹی کے سربراہ اروند کیجریوال کو نشانہ بنایا۔

راج کماری ڈھلوں نے کہا کہ  عام آدمی پارٹی نے دہلی کی کئی سیٹوں سےارکان اسمبلی کے ٹکٹ کاٹے ہیں ۔ یہی نہیں، ہری نگر سیٹ سے موجودہ  رکن اسمبلی  نے الزام لگایا کہ عام آدمی پارٹی خواتین مخالف ہے۔ انہوں نے دعویٰ کیا کہ سابق وزیر اعلی اروند کیجریوال خود اس بار نئی دہلی اسمبلی سے الیکشن ہار رہے ہیں۔

عام آدمی پارٹی کے خلاف بغاوت کرنے والی اور آزاد امیدوار کے طور پر الیکشن لڑنے والی راج کماری ڈھلوں نے عام آدمی پارٹی پر حملہ کرتے ہوئے دعویٰ کیا کہ گزشتہ 10 سالوں میں پارٹی نے اپنی ناکامیوں کا الزام صرف ایل جی پر لگایا ہے اور اس لیے عوام اس میں تبدیلی لائے گی۔

دہلی میں اسمبلی انتخابات 5 فروری کو ہونے والے ہیں۔ نتائج کا اعلان 8 فروری کو کیا جائے گا۔ عام آدمی پارٹی، بھارتیہ جنتا پارٹی اور کانگریس کے درمیان سخت مقابلہ ہےاور تینوں پارٹیاں دہلی انتخابات جیتنے کی پوری کوشش کر رہی ہیں۔ اس بار سخت مقابلہ ہوتا دکھائی دے رہا ہے۔