دہلی میں اگلے تین روز تک بارش کا امکان، شہریوں کو احتیاط برتنے کی ہدایت

نئی دہلی: ہندوستانی محکمہ موسمیات (آئی ایم ڈی) کے مطابق قومی دارالحکومت دہلی میں اگلے تین دنوں کے دوران ہلکی سے درمیانی درجے کی بارش ہونے کا امکان ہے۔ جمعہ سے اتوار کے درمیان بارش کے ساتھ گرج چمک کی پیش گوئی کی گئی ہے، جب کہ بعض اوقات مطلع مکمل طور پر ابر آلود رہے گا۔

آئی ایم ڈی کے جاری کردہ بلیٹن میں بتایا گیا ہے کہ دہلی میں جمعہ کے روز بارش کی شدت میں معمولی کمی آ سکتی ہے، تاہم مجموعی طور پر موسم غیر مستحکم اور نم رہے گا۔ ادارے کے مطابق، اس دوران دہلی میں زیادہ سے زیادہ درجہ حرارت 33 سے 35 ڈگری سیلسیس کے درمیان اور کم سے کم درجہ حرارت 23 سے 25 ڈگری سیلسیس کے درمیان رہنے کا امکان ہے۔

محکمہ موسمیات کا کہنا ہے کہ جمعہ کی صبح شمال مشرقی سمت سے ہوائیں چلیں گی، جو دوپہر تک جنوب مغرب کی جانب ہو جائیں گی، جب کہ شام اور رات کے اوقات میں جنوب مشرقی سمت کی ہوائیں 10 سے 15 کلومیٹر فی گھنٹہ کی رفتار سے چل سکتی ہیں۔

آئی ایم ڈی نے بتایا کہ 2 اور 3 اگست کو بھی ہلکی سے درمیانی بارش جاری رہنے کا امکان ہے۔ ان دنوں میں بھی آسمان ابر آلود رہے گا اور گرج چمک کے ساتھ بارش ہو سکتی ہے۔ ان ایام میں دن کا درجہ حرارت 34 سے 36 ڈگری سیلسیس کے درمیان اور رات کا درجہ حرارت 24 سے 26 ڈگری سیلسیس کے قریب رہنے کی توقع ہے۔

اس سے قبل جمعرات کے روز دہلی کے مختلف علاقوں میں درمیانی بارش ہوئی، جب کہ کچھ مقامات پر شدید بارش کی وجہ سے پانی جمع ہونے اور ٹریفک جام کی صورتحال پیدا ہو گئی۔ محکمہ موسمیات کے مطابق، جمعرات کا زیادہ سے زیادہ درجہ حرارت 29.9 ڈگری سیلسیس رہا، جو معمول سے پانچ ڈگری کم تھا اور کم سے کم درجہ حرارت 24.7 ڈگری سیلسیس ریکارڈ کیا گیا، جو معمول سے دو ڈگری کم تھا۔

آئی ایم ڈی کا کہنا ہے کہ دہلی میں گزشتہ چند دنوں سے وقفے وقفے سے بارش ہو رہی ہے، جس کی وجہ سے روزمرہ سفر کرنے والے شہریوں کو کافی دشواریوں کا سامنا ہے۔ ٹریفک جام، سڑکوں پر پانی جمع ہونے اور آمدورفت میں تاخیر جیسے مسائل شہری زندگی کو متاثر کر رہے ہیں۔