دہلی، یوپی، بہار سمیت 16 ریاستوں میں شدید بارش کا امکان، محکمہ موسمیات کا الرٹ جاری

پورے ملک میں موسم کا مزاج مسلسل بدل رہا ہے۔ شمالی ہند میں چلچلاتی گرمی سے لوگ بے حال ہیں تو کئی حصوں میں شدید بارش سے سیلاب جیسے حالات ہیں۔ اس درمیان محکمہ موسمیات نے اگلے 24 گھنٹے میں دہلی، مدھیہ پردیش، راجستھان، اتر پردیش اور بہار سمیت ملک کی 16 ریاستوں میں شدید بارش کا الرٹ جاری کیا ہے۔

آئی ایم ڈی نے شمال-مغرب، جنوب-مغرب اور جنوب-مشرق دہلی کے لیے آرینج الرٹ جاری کیا ہے۔ اس درمیان ہلکی سے درمیانی بارش کے ساتھ 40 کلومیٹر فی گھنٹہ سے 60 کلومیٹر فی گھنٹہ کی رفتار سے ہوا چلنے کا امکان ہے۔ ممبئی اور کیرالہ کے کچھ حصوں میں بھی شدید بارش کی وارننگ جاری کی گئی ہے۔

محکمہ موسمیات کے مطابق گجرات، مدھیہ پردیش، ودربھ، چھتیس گڑھ، اوڈیشہ اور سکم کے کچھ حصوں میں آج مانسون کے لیے حالات موافق ہیں۔ مانسون کو لے کر ایسے ہی حالات مغربی بنگال، جھارکھنڈ، بہار اور مشرقی اتر پردیش کے باقی حصوں کے لیے بھی اگلے دو دنوں تک رہنے کا امکان ہے۔

کیرالہ اور کرناٹک کے ساحلی اور گھاٹ علاقوں میں 20 سیمی سے زیادہ بارش کا امکان ہے، جس سے لینڈ سلائڈ اور سیلاب کا خطرہ بڑھ گیا ہے۔ مہاراشٹر کے ممبئی اور آس پاس کے علاقوں میں 15-18 جون تک شدید بارش اور آبی جماؤ کا امکان ہے۔ منی پور میں پہلے سے ہی سیلاب سے 1.64 لاکھ لوگ متاثر ہو چکے ہیں اور میزورم میں لینڈ سلائڈ کے واقعات بڑھ رہے ہیں۔

شدید بارش کے پیش نظر لوگوں کو صلاح دی گئی ہے کہ ندی-نالوں کے پاس نہ جائیں، بجلی گرنے سے بچیں اور لینڈ سلائڈ سے ممکنہ علاقوں میں مستعد رہیں۔ کیرالہ، کرناٹک اور گوا کے ساحل پر سمندر میں نہ جانے کی وارننگ دی گئی ہے۔ سیلاب اور لینڈ سلائڈ سے متاثرہ علاقوں میں راحت اور بچاؤ کام کی تیاری کی ہدایت دی گئی ہے۔

وہیں دوسری طرف مشرقی اتر پردیش میں الگ الگ مقامات پر لُو کی حالت بنی رہی۔ تمل ناڈو، کیرالہ، ماہے، وسط مہاراشٹر، ساحلی کرناٹک میں الگ الگ جگہوں پر بھاری بارش ہوئی۔ جنوبی اندرون کرناٹک، مغربی اتر پردیش، ذیلی ہمالیائی مغربی بنگال، گوا، گجرات، اوڈیشہ میں الگ الگ مقامات پر بارش درج کی گئی۔