راہل گاندھی تمل ناڈو کے دورے پر، گُڈالور میں سینٹ تھامس اسکول کی گولڈن جوبلی تقریب میں کریں گے شرکت

لوک سبھا میں قائدِ حزبِ اختلاف راہل گاندھی آج تمل ناڈو کے ضلع نیلگری کے قصبے گڈالور میں واقع سینٹ تھامس انگلش ہائی اسکول کی گولڈن جوبلی تقریبات میں شرکت کے لیے پہنچ رہے ہیں۔ کانگریس کی جانب سے جاری معلومات کے مطابق راہل گاندھی سہ پہر تقریباً تین بج کر پندرہ منٹ پر اسکول میں منعقد ہونے والی اس خصوصی تقریب میں شریک ہوں گے۔

کانگریس ذرائع نے واضح کیا ہے کہ اس دورے کے دوران کسی بھی قسم کی سیاسی سرگرمی، اجلاس یا عوامی خطاب کا کوئی پروگرام طے نہیں ہے، سوائے اس کے کہ ہیلی پیڈ پر کانگریس کے مقامی ذمہ داران کی جانب سے ایک رسمی استقبالیہ دیا جائے گا۔ پارٹی کے ایک عہدیدار کے مطابق راہل گاندھی میسورو سے ہیلی کاپٹر کے ذریعے تقریباً ساڑھے تین بجے گڈالور پہنچیں گے، اسکول کی تقریب میں شرکت کے بعد ساڑھے چار بجے واپس روانہ ہو جائیں گے۔

یہ بات بھی قابلِ ذکر ہے کہ راہل گاندھی اس سے قبل ستمبر 2022 میں بھارت جوڑو یاترا کے دوران گڈالور آئے تھے۔ اس موقع پر انہوں نے حامیوں سے خطاب کرتے ہوئے مغربی گھاٹ کے اس خوبصورت اور سرسبز قصبے کی قدرتی دلکشی کی تعریف کی تھی۔ اس دورے کے دوران انہوں نے ایک نجی اسکول میں قیام کیا تھا اور بعد ازاں کرناٹک کے لیے روانہ ہو گئے تھے۔

آج ہونے والی گولڈن جوبلی تقریب میں مالنکارا مار تھوما سریانی چرچ کے میٹروپولیٹن، ریورنڈ ڈاکٹر میتھیوز مار ماکاریوس ایپسکوپا کی شرکت بھی متوقع ہے۔ اسکول کی پچاس سالہ تعلیمی خدمات کے موقع پر منعقد کی جانے والی یہ تقریب مقامی تعلیمی اور سماجی حلقوں کے لیے خصوصی اہمیت رکھتی ہے۔