راہل گاندھی سمیت اپوزیشن رہنماؤں کا مرکزی بجٹ پر حملہ، کہا- ’بے روزگاری، کسان اور معیشت کے اصل بحران نظر انداز‘

وزیرِ خزانہ نرملا سیتارمن نے پارلیمنٹ میں مرکزی بجٹ 2025-26 پیش کیا، جسے حکومت نے ’وکست بھارت‘ کے وژن پر مبنی قرار دیا ہے۔ وزیرِ خزانہ کے مطابق اس بجٹ میں صحت، دفاع، زراعت، نوجوانوں اور بنیادی ڈھانچے جیسے اہم شعبوں پر توجہ دی گئی ہے تاکہ معیشت کو مضبوط بنیاد فراہم کی جا سکے۔ تاہم بجٹ پیش ہونے کے فوراً بعد اپوزیشن جماعتوں کی جانب سے شدید ردعمل سامنے آیا اور اسے عوامی مسائل سے کٹا ہوا قرار دیا گیا۔

کانگریس کے سینئر رہنما اور لوک سبھا میں قائدِ حزبِ اختلاف راہل گاندھی نے مرکزی بجٹ پر سب سے سخت تنقید کی۔ انہوں نے سوشل میڈیا پلیٹ فارم ایکس پر پوسٹ کرتے ہوئے کہا کہ اس بجٹ میں بے روزگار نوجوانوں، گرتی ہوئی مینوفیکچرنگ، سرمایہ کاروں کے سرمائے کے انخلا، گھریلو بچت میں تیز گراوٹ اور کسانوں کی بڑھتی ہوئی پریشانیوں کو مکمل طور پر نظر انداز کیا گیا ہے۔

راہل گاندھی کے مطابق آنے والے عالمی معاشی جھٹکوں کے خطرات کو بھی نظرانداز کیا گیا، جو ملک کی معیشت کے لیے سنگین نتائج پیدا کر سکتے ہیں۔ ان کا کہنا تھا کہ یہ ایسا بجٹ ہے جو اصلاحات سے انکار کرتا ہے اور ہندوستان کے اصل معاشی بحرانوں سے نابلد ہے۔

راہل گاندھی کے علاوہ دیگر اپوزیشن رہنماؤں نے بھی اسی لب و لہجے میں حکومت کو گھیرنے کی کوشش کی۔ پنجاب کے وزیرِ اعلیٰ بھگونت مان نے کہا کہ مرکزی بجٹ ایک بار پھر پنجاب کی امیدوں پر پورا نہیں اترا۔ ان کے مطابق نہ کسانوں کے لیے کم از کم امدادی قیمت یعنی ایم ایس پی پر کوئی ٹھوس اعلان ہوا اور نہ ہی نوجوانوں کے لیے روزگار یا صنعت و ٹیکس میں راحت دی گئی۔ انہوں نے الزام لگایا کہ پنجاب کے ساتھ مسلسل سوتیلا سلوک کیا جا رہا ہے۔

مغربی بنگال کی وزیرِ اعلیٰ ممتا بنرجی نے بجٹ کو سمت سے محروم قرار دیتے ہوئے کہا کہ یہ غریب، خواتین، کسان، درج فہرست ذاتوں، درج فہرست قبائل اور پسماندہ طبقات کے خلاف ہے۔ انہوں نے تعلیم کی سبسڈی میں کمی، معیشت کی کمزوری اور شیئر بازار میں گراوٹ کا حوالہ دیتے ہوئے حکومت کے دعووں کو گمراہ کن بتایا۔

بہار سے راشٹریہ جنتا دل کی رکنِ پارلیمنٹ میسا بھارتی نے کہا کہ بجٹ میں بہار کا نام تک شامل نہیں کیا گیا۔ ان کے مطابق انتخابی وعدوں کے باوجود ریاست کے لیے کوئی ٹھوس قدم نہیں اٹھایا گیا اور وکست بھارت کے دعوے محض نعرہ ثابت ہو رہے ہیں۔

اتر پردیش کے سابق وزیرِ اعلیٰ اور سماجوادی پارٹی کے صدر اکھلیش یادو نے الزام لگایا کہ بجٹ چند مخصوص لوگوں کو فائدہ پہنچانے کے لیے تیار کیا گیا ہے اور اس میں بنیادی ڈھانچے سے متعلق کوئی واضح منصوبہ دکھائی نہیں دیتا۔

کیرالہ کے وزیر پی راجیو نے مرکز پر کیرالہ کے ساتھ امتیازی سلوک کا الزام لگاتے ہوئے کہا کہ ریاست کی مانگوں کو مسلسل نظرانداز کیا جا رہا ہے۔ کانگریس کے رکنِ پارلیمنٹ گورو گوگوئی نے بھی حکومت کی معاشی پالیسیوں پر تشویش ظاہر کی، جبکہ ڈی ایم کے کی رکنِ پارلیمنٹ کنی موزھی نے ریاستوں کو دیے جانے والے فنڈ میں کمی کو مایوس کن قرار دیا۔