راہل گاندھی کی ’ووٹ چوری ‘ کے خلاف مہم، ویب سائٹ اور مسڈ کال نمبر جاری، الیکشن کمیشن سے شفافیت کا مطالبہ

نئی دہلی: کانگریس کے رکن پارلیمنٹ اور قائد حزبِ اختلاف راہل گاندھی نے ’ووٹ چوری‘ کے خلاف ایک نئی مہم کا آغاز کیا ہے۔ اس مہم کے تحت انہوں نے ایک ویب سائٹ لانچ کی ہے اور عوام سے اپیل کی ہے کہ وہ انتخابی عمل میں گڑبڑی کے خلاف کھڑے ہوں۔ انہوں نے اس مقصد کے لیے ایک مسڈ کال نمبر بھی جاری کیا ہے تاکہ زیادہ سے زیادہ لوگ اس مہم میں شامل ہو سکیں۔

راہل گاندھی نے اپنے سوشل میڈیا پلیٹ فارمز پر ایک پیغام میں کہا کہ ’’ووٹ چوری ’ایک شخص، ایک ووٹ‘ کے بنیادی جمہوری اصول پر حملہ ہے۔ آزاد اور منصفانہ انتخابات کے لیے صاف اور درست ووٹر لسٹ ناگزیر ہے۔ کانگریس کی الیکشن کمیشن سے واضح مانگ ہے کہ شفافیت دکھائی جائے اور ڈیجیٹل ووٹر لسٹ عوام کے لیے جاری کی جائے تاکہ عوام اور سیاسی جماعتیں خود اس کا آڈٹ کر سکیں۔‘‘

اس مہم میں شامل ہونے کے لیے راہل گاندھی نے عوام سے درخواست کی کہ وہ ویب سائٹ votechori.in/ecdemand پر جائیں یا پھر 9650003420 پر مسڈ کال دیں۔ ان کے مطابق یہ لڑائی صرف انتخابی عمل کی درستگی کے لیے نہیں بلکہ پورے جمہوری نظام کے تحفظ کے لیے ہے۔

راہل گاندھی کی اس اپیل پر سوشل میڈیا پر بڑی تعداد میں ردعمل سامنے آیا ہے۔ متعدد افراد نے ان کی پوسٹ کے کمنٹ سیکشن میں اپنی حمایت کے سرٹیفکیٹ شیئر کیے۔ ایک صارف، جن کا نام پرتیک پاٹل بتایا گیا، نے لکھا: ’’میں پرتیک پاٹل، #VoteChori کے خلاف ہوں۔ میں الیکشن کمیشن سے ڈیجیٹل ووٹر لسٹ کی راہل گاندھی کی مانگ کی حمایت کرتا ہوں۔‘‘

اسی طرح ایک اور شخص، محمد شاداب خان، نے اپنا سرٹیفکیٹ پوسٹ کرتے ہوئے لکھا: ’’میں محمد شاداب خان، #VoteChori کے خلاف کھڑا ہوں۔ میں راہل گاندھی کی الیکشن کمیشن سے ڈیجیٹل ووٹر لسٹ کی مانگ کی حمایت کرتا ہوں۔‘‘ انہوں نے ساتھ ہی یہ پیغام انگریزی میں بھی تحریر کیا۔

راہل گاندھی کی اس مہم نے سیاسی ماحول میں ایک نئی بحث چھیڑ دی ہے۔ کانگریس کا کہنا ہے کہ یہ اقدام انتخابی عمل کی شفافیت کو یقینی بنانے کے لیے کیا گیا ہے، جبکہ بی جے پی اسے سیاسی حربہ قرار دے رہی ہے۔ تاہم سوشل میڈیا پر ملنے والا ردعمل ظاہر کرتا ہے کہ عوام بڑی تعداد میں اس مطالبے کو سنجیدگی سے لے رہے ہیں اور فعال طور پر اس میں شامل ہو رہے ہیں۔ یہ مہم آنے والے دنوں میں انتخابی اصلاحات اور شفافیت کے حوالے سے بحث کو مزید تیز کرنے کا امکان رکھتی ہے۔