’پہلگام واقعہ پر حکومت سے سوال پوچھنے کی جگہ میڈیا نے کیا اُکساوے کا کام‘، مشہور مصنف پروشوتم اگروال کا سنگین الزام

معروف دانشور اور مصنف پروشوتم اگروال نے پہلگام میں ہوئے دہشت گردانہ حملے پر بہت صفائی کے ساتھ اپنی بات رکھی ہے۔ انھوں نے اس واقعہ پر اظہارِ غم کرتے ہوئے میڈیا کے کردار پر سنگین سوال اٹھایا ہے۔ سوشل میڈیا پلیٹ فارم ’ایکس‘ پر انھوں نے ایک ویڈیو پیغام کے ذریعہ کہا ہے کہ جب دہشت گردانہ حملہ ہوا تو اس وقت فہم سے کام لینے کی جگہ ملک کی میڈیا نے لوگوں کو اکسانے والا کام کیا۔ میڈیا کا کام حکومت سے سوال پوچھنا ہے، لیکن ایسا نہ کر بیشتر میڈیا ادارہ ماحول کو خراب کرنے کی کوشش کر رہا تھا۔

سابق پروفیسر اور پبلک سروس کمیشن کے سابق رکن پروشوتم اگروال نے پہلگام واقعہ پر حکومت سے بھی سوال پوچھے ہیں اور اس کے ذریعہ دیے گئے رد عمل پر بھی سوالیہ نشان لگایا ہے۔ انھوں نے کہا کہ سندھو آبی معاہدہ کو ملتوی کر دینا اچھا قدم ہے، لیکن یہ پاکستان کو سبق سکھانے کا فوری طریقہ نہیں ہو سکتا۔ اس معاہدہ کے تحت ہندوستانی ندیوں کا پانی پاکستان نہ پہنچے اس کے لیے پشتے بنانے ہوں گے اور اس میں سالوں لگ جائیں گے۔ انھوں نے سوال کیا کہ ابھی فوری کیا اقدام کیے جا رہے ہیں؟ پاکستان کو کس طرح دنیا کے سامنے اس حملے کے لیے ذمہ دار ٹھہرانے جا رہے ہیں؟ پروشوتم اگروال کا کہنا ہے کہ یہ اور اس جیسے سوال میڈیا کو حکومت سے پوچھے چاہیے تھے، لیکن میڈیا لگا ہوا ہے شور مچانے میں، حکومت کی غلطیوں اور سیکورٹی میں ہوئی چوک کو چھپانے میں، اپوزیشن کو بدنام کرنے میں اور سب سے افسوسناک یہ کہ ملک میں کشیدگی کو بڑھانے میں۔

پروشوتم اگروال نے کہا کہ اس میں کوئی شبہ نہیں کہ مذہب کے نام پر قتل عام ہوا، لیکن اگر مارنے والے مسلمان تھے تو مدد کرنے والے بھی مسلمان ہی تھے، اسے بھی میڈیا کو سامنے رکھنا چاہیے۔ انھوں نے مزید کہا کہ خوش قسمتی سے جتنا نقصان سماج کا میڈیا اپنی بے وقوفی سے کرنا چاہتا تھا، وہ نہیں ہوا، لیکن جتنا نقصان ہوا ہے وہ بھی کم فکر کی بات نہیں ہے۔