شمبھو بارڈر پر دھرنا ختم، کسان رہنما گرفتار، کانگریس کا شدید ردعمل، کسانوں کے ساتھ دھوکہ قرار دیا

چنڈی گڑھ: پنجاب پولیس نے بدھ کو پنجاب-ہریانہ شمبھو بارڈر پر کسانوں کا دھرنا زبردستی ختم کرا دیا۔ پولیس نے کسانوں کے ٹینٹ اکھاڑ دیے، ان کا دفتر توڑ دیا اور احتجاجی اسٹیج کو بلڈوزر سے منہدم کر دیا۔ اس کارروائی کے دوران کسان مزدور مورچہ کے رہنما سرون سنگھ پنڈھیر، جگجیت سنگھ ڈلےوال سمیت کئی کسان رہنماؤں کو حراست میں لے لیا گیا۔

اس کارروائی پر کانگریس نے شدید ردعمل ظاہر کرتے ہوئے پنجاب حکومت پر الزام لگایا کہ اس نے کسانوں کی پیٹھ میں چھرا گھونپ دیا ہے۔ کانگریس کے سینئر رہنما پرتاب سنگھ باجوہ نے کہا، ’’پنجاب کے کسانوں کو مذاکرات کے بہانے بلا کر گرفتار کرنا بزدلانہ حرکت ہے۔ یہ پنجاب کی روایت کے خلاف ہے اور عوام اس دھوکے کو کبھی معاف نہیں کریں گے۔‘‘

پنجاب کانگریس کے صدر امریندر سنگھ راجہ وڑنگ نے بھی کارروائی کی مذمت کرتے ہوئے کہا، "پنجاب کی عام آدمی پارٹی (عآپ) حکومت اور مرکز میں بھارتیہ جنتا پارٹی (بی جے پی) نے کسانوں کو دھوکہ دیا ہے۔ یہ حیران کن ہے کہ مذاکرات جاری رہنے کے باوجود کسان رہنماؤں کو گرفتار کیا گیا۔‘‘

کانگریس کے رہنما رندیپ سنگھ سرجےوالا نے بھی حکومت کو تنقید کا نشانہ بنایا۔ انہوں نے کہا، ’’مرکز اور پنجاب حکومت نے مل کر کسانوں کو کم از کم امدادی قیمت (ایم ایس پی) پر بات چیت کے بہانے بلایا اور پھر گرفتار کر کے دھوکہ دیا۔‘‘

شیرومنی اکالی دل (ایس اے ڈی) کے صدر سکھبیر سنگھ بادل اور سابق مرکزی وزیر ہرسمرت کور بادل نے بھی کسان رہنماؤں کی گرفتاری کی مذمت کرتے ہوئے ان کی فوری رہائی کا مطالبہ کیا۔

پنجاب پولیس کے ڈی آئی جی ہرمیندر سنگھ گل نے بتایا کہ تقریباً 40 سے 50 کسانوں نے خود کو پولیس کے حوالے کر دیا ہے۔ انہوں نے کہا، ’’اگر کوئی کسان گرفتاری چاہے تو اسے گرفتار کیا جائے گا اور اگر چھوڑنے کی درخواست کرے گا تو اسے چھوڑ دیا جائے گا۔ ہم نے کسی کو زبردستی قید نہیں کیا ہے۔‘‘

پولیس نے غیر قانونی طور پر بنی تمام تعمیرات کو توڑنے کا عمل جاری رکھا اور شمبھو بارڈر کو مکمل طور پر خالی کرانے کا اعلان کیا۔