پنجاب: کسانوں نے مرکزی وزیر سوم پرکاش کا راستہ روکا، دھرنے پر بیٹھے

ہوشیارپور: زرعی قوانین کی مخالفت میں جاری کسان تحریک کے درمیان آج کسانوں نے یہاں مرکزی وزیر صنعت و تجارت سوم پرکاش کا راستہ روکا اور دھرنے پر بیٹھ گئے۔ سابق وزیراعظم اٹل بہاری واجپئی کی سالگرہ کے موقع پر مقامی والمیکی محلے میں واقع ایک دھرمشالہ میں منعقد ایک پروگرام میں مرکزی وزیر کے آنے کی اطلاع ملتے ہی کئی کسان بہادرپور چوک پہنچ گئے اور پولیس بیریکیڈ توڑ کر جائے پروگرام کی جانب بڑھنے گلے۔ پولیس نے کسی طرح انھیں والمیکی محلے کی گلی کے باہر روکا۔

بعد ازاں کسان روڈ پر بیٹھ گئے اور دھرنا شروع کر دیا۔ ان کے ہاتھوں میں کالے اور پیلے جھنڈے تھے اور وہ مرکزی حکومت کے خلاف نعرہ بازی کرنے لگے۔ پولیس کو سوم پرکاش کو پروگرام کی جگہ تک پہنچانے کے لیے تنگ گلیوں والے راستے کا استعمال کرنا پڑا۔

پروگرام کے بعد میڈیا سے بات چیت میں سوم پرکاش نے الزام عائد کیا کہ کسانوں کو بد عناصر ورغلا رہے ہیں۔ انہوں نے کانگریس سمیت اپوزیشن پارٹیوں کی جانب سے زرعی اصلاحاتی قوانین کی بابت جھوٹ اور افواہیں پھیلانے کا الزام عائد کیا۔ بی جے پی کے رہنما نے امید ظاہر کی کہ کسانوں، مرکزی حکومت کی بات چیت سے کوئی حل نکلے گا۔

انہوں نے ’پی ایم کسان ندھی یوجنا‘ کے تحت اٹل جینتی کے موقع پر کسانوں کو 18000 کروڑ روپیے جاری کرنے کے سلسلے میں وزیراعظم کی تعریف کی۔ انہوں نے دعویٰ کیا کہ کسان جانتے ہیں کہ نئے زرعی اصلاحاتی قوانین میں ان کا فائدہ ہے۔ قبل ازیں پروگرام میں انہوں نے واجپئی کو خراج عقیدت پیش کیا۔