’صدر جمہوریہ سبھی بلوں کو منظوری دیں‘، تلنگانہ کے وزیر اعلیٰ ریونت ریڈی نے دہلی کے جنتر منتر پر کیا مظاہرہ

تلنگانہ کے وزیر اعلیٰ ریونت ریڈی نے آج دہلی کے جنتر منتر پر ایک بڑا احتجاجی مظاہرہ کیا۔ یہ احتجاجی مظاہرہ تلنگانہ اسمبلی کے ذریعہ پاس کردہ پسماندہ طبقہ (بی سی) کے ریزرویشن سے متعلق بلوں کو صدر جمہوریہ کی طرف سے منظوری ملنے میں تاخیر کو پیش نظر رکھتے ہوئے کیا گیا۔ ریونت ریڈی کے ساتھ اس احتجاجی مظاہرہ میں تلنگانہ کانگریس کے کارکنان بھی شامل ہوئے۔ انھوں نے مرکزی حکومت پر الزام عائد کیا کہ وہ قصداً ان بلوں کو لٹکا رہی ہے۔

قابل ذکر ہے کہ مارچ 2025 میں تلنگانہ اسمبلی نے 2 اہم بل پاس کیے تھے، جن میں پسماندہ طبقات کو تعلیم، ملازمت اور مقامی بلدیوں میں 42 فیصد ریزرویشن دینے کی سہولت ہے۔ یہ قدم پسماندہ طبقات کو زیادہ نمائندگی اور مواقع دینے کے لیے اٹھایا گیا تھا۔ بل پاس ہونے کے بعد گورنر کے ذریعہ انھیں صدر جمہوریہ کے پاس بھیجا گیا، لیکن اب تک صدر دروپدی مرمو کی منظوری اسے نہیں ملی ہے۔

جنتر منتر پر احتجاجی مظاہرہ میں شامل ریونت ریڈی نے کہا کہ ’’ہم نے صدر جمہوریہ سے ملاقات کے لیے وقت مانگا تھا، لیکن ابھی تک وقت نہیں ملا ہے۔‘‘ وہ مزید کہتے ہیں کہ ’’مجھے لگتا ہے وزیر اعظم نریندر مودی اور امت شاہ صدر پر دباؤ بنا رہے ہیں کہ تلنگانہ کے لوگوں سے ملاقات نہ ہو۔‘‘ وزیر اعلیٰ کا کہنا ہے کہ ہم پسماندہ طبقات کے ساتھ ہیں، راہل گاندھی او بی سی حامی ہیں، جبکہ نریندر مودی او بی سی مخالف ہیں۔ اگر مودی یہ ریزرویشن منظور کرتے ہیں تو ٹھیک، ورنہ ہم انھیں شکست دے کر راہل گاندھی کو وزیر اعظم بنائیں گے اور او بی سی کو ان کا 42 فیصد ریزرویشن دلوا کر رہیں گے۔

وزیر اعلیٰ ریونت ریڈی نے مرکزی حکومت سے اپیل کی ہے کہ تلنگانہ اسمبلی سے پاس بل بہت اہم ہیں اور اس کے سماجی طور پر دور رَس اثرات مرتب ہونے والے ہیں، اس لیے بلوں کو منظوری دینے میں تاخیر نہ کی جائے۔ انھوں نے یہ بھی کہا کہ یہ ریزرویشن غریب اور محروم طبقات کو انصاف دلانے کے لیے بے حد ضروری ہیں۔ وزیر اعلیٰ نے عزم ظاہر کیا کہ جب تک صدر جمہوریہ کے ذریعہ ان بلوں کو منظوری نہیں مل جاتی، تب تک خاموشی سے نہیں بیٹھیں گے۔