صدر جمہوریہ دروپدی مرمو کا یوم پیدائش، وزیراعظم مودی، کانگریس صدر کھڑگے سمیت دیگر قائدین کی نیک تمنائیں

نئی دہلی: صدر جمہوریہ دروپدی مرمو کے یومِ پیدائش کے موقع پر وزیراعظم نریندر مودی اور کانگریس صدر ملکارجن کھڑگے سمیت ملک کی سرکردہ شخصیات نے انہیں نیک تمناؤں سے نوازا ہے۔ وزیراعظم نے انہیں ملک کے کروڑوں عوام کے لیے حوصلے اور امید کی کرن قرار دیا۔

سوشل میڈیا پلیٹ فارم ایکس (سابقہ ٹوئٹر) پر اپنے پیغام میں وزیراعظم مودی نے کہا، ’’صدر جمہوریہ دروپدی مرمو کو سالگرہ کی دلی مبارکباد۔ ان کی زندگی اور قیادت ملک کے کروڑوں افراد کے لیے ہمیشہ باعثِ تحریک رہے گی۔‘‘

وزیر اعظم مودی نے مزید لکھا، ’’عوامی خدمت، سماجی انصاف اور جامع ترقی کے لیے ان کی غیر متزلزل وابستگی ہر کسی کے لیے امید اور طاقت کا سرچشمہ ہے۔ انہوں نے ہمیشہ غریبوں اور محروموں کو بااختیار بنانے کے لیے کام کیا ہے۔ میں دعا گو ہوں کہ خدا انہیں ایک طویل، صحت مند اور بامقصد زندگی عطا فرمائے تاکہ وہ قوم کی خدمت کرتی رہیں۔‘‘

کانگریس کے صدر ملکارجن کھڑگے نے بھی صدر کو مبارکباد پیش کرتے ہوئے کہا کہ ان کی ذہانت اور ملک کی ترقی، بہبود اور انصاف کے تئیں عزم و ایثار قوم کو سچائی اور نیکی کے راستے پر گامزن رکھے گا۔ انہوں نے صدر کے صحت مند اور طویل العمر ہونے کی دعا کی۔

وزیر دفاع راج ناتھ سنگھ نے دروپدی مرمو کے سیاسی سفر کو ہندوستانی جمہوریت کی مضبوطی کی علامت قرار دیا۔ انہوں نے کہا، "زمینی سطح سے لے کر ملک کے اعلیٰ ترین آئینی عہدے تک ان کا سفر جمہوریت کے استحکام کو ظاہر کرتا ہے۔ سماجی انصاف، غریبوں کو بااختیار بنانے اور ہمہ گیر ترقی کے لیے ان کی پختہ وابستگی قوم کو متاثر کرتی رہے گی۔"

مرکزی وزیر نتن گڈکری نے بھی ایکس پر اپنے پیغام میں صدر کو سالگرہ کی مبارکباد دیتے ہوئے ان کی صحت، لمبی عمر اور کامیاب زندگی کی دعا کی۔

صدر مرمو، جو قبائلی پس منظر سے تعلق رکھتی ہیں، اپنے وقار، سادگی اور عوامی خدمت کے جذبے کے باعث ملک بھر میں مقبول ہیں۔ ان کی قیادت کو ملک کے مختلف طبقوں میں قدر کی نگاہ سے دیکھا جاتا ہے۔ ان کے یوم پیدائش پر قوم بھر سے مبارکبادوں کا سلسلہ جاری ہے۔