دہلی کی 4 مصروف ترین سڑکوں کو جام سے پاک کرنے کی تیاری، محکمہ تعمیرات عامہ اور ٹریفک پولیس کا یو-ٹرن منصوبہ

دہلی میں جام ایک بڑا مسئلہ ہے۔ لوگوں کو اس کی وجہ سے کافی پریشانیوں کا سامنا کرنا پڑتا ہے۔ ایسے میں سڑکوں کو جام سے پاک کرنے کے لیے محکمہ تعمیرات عامہ اور ٹریفک پولیس یو-ٹرن منصوبہ پر ساتھ میں کام کرنے جا رہی ہے۔ اس کے تحت بہت کم لاگت میں دہلی کے چار مصروف ترین راستوں کو جام سے چھٹکارہ دلانے پر کام ہوگا۔ اس منصوبہ میں رِنگ روڈ، نجف گڑھ روڈ، ایم بی روڈ اور روہتک روڈ شامل ہیں۔

یہ ایسے راستے ہیں جہاں ابھی فلائی اوور نہیں بنایا جا سکتا ہے۔ ان سڑکوں کا سروے کرنے کے بعد لال بتیاں بند کرنے کا مشورہ دیا گیا ہے۔ ان سڑکوں پر لال بتیاں زیادہ ہیں۔ رِنگ روڈ پر ڈھائی کلومیٹر راستے میں 10 لال بتیاں ہیں تو روہتک روڈ پر 13 کلومیٹر میں 14 لال بتیاں ہیں۔ جو لوگ ان راستوں پر گزرتے ہیں وہ اس سے پریشان ہوتے ہیں۔

ٹریفک پولیس کے اسپیشل کمشنر اجئے چودھری نے 24 اپریل کو محکمہ تعمیرات عامہ کے چیف انجینئر نعیم الدین کو خط لکھ کر رپورٹ کی بنیاد پر مہرولی-بدر پور روڈ، روہتک روڈ اور نجف گڑھ روڈ کو یو-ٹرن منصوبہ کے تحت سگنل فری کرنے کے لیے کام کرنے کی بات کہی ہے۔

وہیں ٹریفک پولیس کے سنٹرل رینج کے ڈپٹی کمشنر نے گزشتہ 17 اپریل کو پی ڈبلیو ڈی کے سپرنٹنڈنگ انجینئر کو خط لکھ کر رِنگ روڈ کے دہلی اسمبلی سے کنگس وے کیمپ تک کی 10 لال بتیوں کو بند کرکے یو-ٹرن منصوبہ نافذ کرنے کے لیے کہا ہے۔

پی ڈبلیو ڈی کے چیف انجینئر نعیم الدین کی قیادت میں محکمہ کے مینٹیننس ڈپارٹمنٹ سے متعلق تینوں چیف انجینئروں نے اپنے اپنے علاقے میں اس منصوبہ پر جلد سے جلد کام کرنے کی حکمت عملی طے کرکے کام کرنے کا فیصلہ کیا ہے۔ محکمہ کے مطابق جلد ہی اس منصوبہ پر کام شروع کر دیا جائے گا۔

 پی ڈبلیو ڈی کے سینئر افسر نے بتایا کہ ابھی اس منصوبہ پر عارضی طور سے لال بتیاں بند کی جائیں گی اور ضرورت کے حساب سے یو-ٹرن کھولے جائیں گے۔ لوگوں کی سہولت اور جام کی حالت کا اندازہ کرنے کے بعد عارضی طور سے لال بتیوں کو بند کر دیا جائے گا۔

مہرولی-گروگرام روڈ (ایم بی روڈ)، روہتک روڈ (پیرا گڑھی چوک سے ٹکری بارڈر تک) نجف گڑھ روڈ (اُتم نگر چوک سے رِنگ روڈ راجوری گارڈن تک) اور رِنگ روڈ کے دہلی اسمبلی سے کنگس وے کیمپ تک ایک مشترکہ جائزہ لیا گیا ہے۔ انہی راستوں کو سگنل فری کرنے کا منصوبہ بنایا گیا ہے۔