پونچھ: ایل او سی پر دراندازی کی کوشش کرنے والا ایک ملی ٹنٹ ہلاک

جموں: فوج نے جموں و کشمیر کے ضلع پونچھ میں لائن آف کنٹرول (ایل او سی) کے کرشنا گھاٹی سیکٹر پر دراندازی کی کوشش کو ناکام بنانے کے دوران ایک ملی ٹنٹ کو ہلاک جبکہ دو دیگر کو زخمی کرنے کا دعویٰ کیا ہے۔ جموں میں تعینات دفاعی ترجمان لیفٹیننٹ کرنل دیویندر آنند نے بتایا کہ 7 اگست کو ملی ٹنٹوں کے ایک گروپ نے کرشنا گھاٹی سیکٹر کے راستے سرحد کے اس پار داخل ہونے کی کوشش کی۔

انہوں نے کہا کہ 'مستعد فوجیوں نے ملی ٹنٹوں کو دیکھتے ہی فائرنگ کی جس کے نتیجے میں ایک ملی ٹنٹ کی موقع پر ہی موت واقع ہوئی جبکہ دو دیگر شدید طور پر زخمی ہوگئے'۔ دفاعی ترجمان کے مطابق تلاشی آپریشن کے دوران ہمارے فوجیوں نے دیکھا کہ لاش کو وہاں سے ہٹایا گیا تھا جس کے نشان واضح تھے۔ انہوں نے کہا کہ جائے واردات سے ایک اے کے 47 رائفل اور پاکستان مارکنگ والی کھانے کی کچھ چیزیں برآمد ہوئی ہیں۔

لیفٹیننٹ کرنل دیویندر آنند نے بتایا کہ ایل او سی پر تعینات سیکورٹی فورسز پاکستان کے مذموم عزائم کو خاک میں ملانے کے لئے مضبوط انسداد دراندازی گرڈ کو برقرار رکھے ہوئے ہیں۔ انہوں نے مزید کہا کہ جس دن دراندازی کی یہ کوشش کی گئی عین اسی دن پاکستانی فوج نے کرشنا گھاٹی، منکوٹ اور مینڈھر سیکٹروں میں جنگ بندی معاہدے کی خلاف ورزی کی تھی۔