وزیر اعظم مودی کی صدر جن پنگ سے ملاقات، سرحد پر امن، آپسی تعاون اور تعلقات کی مضبوطی پر زور

وزیر اعظم نریندر مودی نے چین کے تیانجن میں صدر شی جن پنگ سے ملاقات کی ہے۔ یہ ملاقات شنگھائی تعاون تنظیم (ایس سی او) کی سمٹ سے پہلے ہوئی ہے۔ اس دوران مودی اور جن پنگ کے درمیان تقریباً ایک گھنٹے تک دوطرفہ میٹنگ چلی۔ میٹنگ میں وزیر اعظم مودی نے سرحد پر امن، آپسی تعاون اور تعلقات کی مضبوطی پر زور دیا۔

وزیر اعظم نریندر مودی نے چینی صدر سے ملاقات کے دوران کہا کہ گرمجوشی بھرے استقبال کے لیے آپ کا شکریہ ادا کرتا ہوں۔ گزشتہ سال کزان میں ہماری بہت ہی مثبت بات چیت ہوئی تھی۔ ہمارے تعلقات کو ایک مثبت سمت ملی ہے، سرحد پر ’ڈِس انگیجمنٹ‘ کے بعد امن اور استحکام کا ماحول بنا ہوا ہے۔ انہوں نے کہا کہ ہمارے خصوصی نمائندوں کے درمیان بارڈر مینجمنٹ کے سلسلے میں اتفاق قائم ہوا ہے۔ کیلاش مان سروور یاترا پھر سے شروع کی گئی ہے۔

مودی نے کہا کہ دونوں ملکوں کے درمیان براہ راست پروازیں شروع کی جا رہی ہیں۔ ہمارے تعاون سے دونوں ملکوں میں 2.8 بلین لوگ بھی جڑے ہوئے ہیں اور اس سے پوری انسانیت کی فلاح کی راہ ہموار ہوگی۔ مودی نے آگے کہا کہ آپسی اعتماد، احترام اور حساسیت کی بنیاد پر ہم اپنے تعلقات کو آگے بڑھانے کے لیے پُرعزم ہیں۔ وزیر اعظم مودی نے چین کی طرف سے ایس سی او کی کامیاب صدارت کے لیے شی جن پنگ کو مبارک باد پیش کی۔

چینی صدر جن پنگ نے کہا کہ وزیر اعظم مودی سے مل کر خوشی ہوئی۔ انہوں نے آپسی تعلقات کو مضبوط کرنے پر زور دیتے ہوئے کہا کہ کزان میں گزشتہ سال ہوئی ہماری میٹنگ کامیاب رہی اور ہند-چین کے لیے ساتھ آنا ضروری ہے۔ جن پنگ نے کہا کہ ہم آپسی تعاون کے لیے پوری طرح سے راضی ہیں۔

چینی صدر نے کہا کہ دنیا تبدیلی کی طرف بڑھ رہی ہے۔ چین اور ہندوستان دو سب سے مہذب ملک ہیں۔ ہم دنیا کی دو سب سے زیادہ آبادی والے ملک اور گلوبل ساؤتھ کا حصہ ہیں۔ انہوں نے کہا کہ دوست بنانا، ایک اچھا پڑوسی بننا اور ڈریگن اور ہاتھی کا ایک ساتھ آنا بہت ضروری ہے۔

چینی صدر نے مزید کہا، ’’اس سال ہند-چین سفارتی تعلقات کی 75ویں سالگرہ ہے۔ دونوں ملکوں کو اپنے تعلقات کو سیاسی، اسٹریٹجک اور  طویل مدتی نظریہ سے سنبھالنے کی ضرورت ہے۔ بین الاقوامی تنظیموں میں جمہوریت کو بنائے رکھنے کی اپنی تاریخی ذمہ داریوں کو بھی پورا کرنا ہوگا۔ ساتھ ہی ایشیا اور دنیا بھر میں امن اور خوشحالی کے لیے مل کر کام کرنا ہوگا۔‘‘

چینی صدر جن پنگ سے ملاقات کے دوران ہندوستان کی طرف سے وزیر اعظم نریندر مودی کے ساتھ این ایس اے اجیت ڈوبھال، خارجہ سکریٹری وکرم مسری، سفیر پردیپ راوت اور جوائنٹ سکریٹری ایسٹ ایشیا گورانگ لال داس موجود رہے۔