وزیر دفاع مچھلی خرید رہے تھے اور مودی جی نے سودا کر لیا: راہل گاندھی

کانگریس سربراہ راہل گاندھی کرناٹک دورہ میں بی جے پی پر حملہ کرنے کا کوئی موقع نہیں چھوڑ رہے ہیں۔ طویل مدت سے رافیل طیارہ معاہدہ پر مودی حکومت کو نشانہ بنانے والے راہل گاندھی نے آج ایک بار پھر وزیر اعظم نریندر مودی پر طنز کے تیر برسائے۔ کرناٹک کے سوندتی میں ایک جلسۂ عام سے خطاب کرتے ہوئے راہل گاندھی نے کہا کہ رافیل معاہدہ سے متعلق وزیر اعظم نریندر مودی نے وزیر دفاع سے بھی کوئی مشورہ نہیں کیا۔ انھوں نے کہا کہ ’’وزیر دفاع گوا میں تھے، مچھلی کی دکان میں مچھلی خرید رہے تھے اور ان کو پتہ بھی نہیں تھا کہ مودی جی نے رافیل کا کانٹریکٹ بدل دیا۔‘‘

راہل گاندھی اتنے پر ہی خاموش نہیں ہوئے، انھوں نے بی جے پی حکمراں ریاست مدھیہ پردیش میں ہوئے ویاپم گھوٹالہ پر بھی سوالیہ نشان لگایا۔ انھوں نے بی جے پی پر مینجمنٹ کو برباد کرنے کا الزام عائد کیا۔ انھوں نے کہا کہ ’’مدھیہ پردیش میں ویاپم گھوٹالہ کر کے بی جے پی کے لوگوں نے پورے تعلیمی نظام کو ختم کر دیا۔‘‘

راہل گاندھی کے ذریعہ مودی حکومت پر تنقید کا یہ سلسلہ کرناٹک دورہ کے دوران تیز ہو گیا ہے۔ اتوار کو بھی ایک جلسہ عام سے خطاب کرتے ہوئے انھوں نے وزیر اعظم نریندر مودی کو نشانہ بنایا تھا اور پنجاب نیشنل بینک میں ہوئے گھوٹالہ سے متعلق لوگوں کے سامنے اپنی بات رکھی تھی۔ انھوں نے کہا تھا کہ ’’وجے مالیا، نیرو مودی اور للت مودی ملک چھوڑ کر بھاگ گئے، اس وقت ملک کا چوکیدار کیا کر رہا تھا۔‘‘