مجھے نہیں لگتا وزیر اعظم آج لوک سبھا آئیں گے، آئے تو خود کتاب دے کر سچ سامنے لاؤں گا: راہل گاندھی

نئی دہلی: لوک سبھا میں قائد حزب اختلاف راہل گاندھی نے وزیر اعظم نریندر مودی پر سخت حملہ کرتے ہوئے کہا ہے کہ انہیں نہیں لگتا کہ وزیر اعظم میں آج ایوان میں آنے کی ہمت ہوگی، کیونکہ اگر وہ آتے ہیں تو وہ خود ان کے پاس جا کر جنرل منوج نرونے کی کتاب پیش کریں گے تاکہ ملک کے سامنے سچائی آ سکے۔ راہل گاندھی کا یہ بیان ہند-چین اور لداخ کی صورت حال سے متعلق ان کے بیان پر جاری حزب اقتدار کی ہنگامہ آرائی کے بعد سامنے آیا ہے۔

راہل گاندھی نے کہا کہ یہ کتاب سابق فوجی سربراہ جنرل منوج نرونے کی ہے، جس میں لداخ کے واقعات کی تفصیل درج ہے۔ ان کے مطابق انہیں بتایا گیا ہے کہ وہ اس کتاب کا حوالہ نہیں دے سکتے لیکن اصل سوال یہ ہے کہ اس بحران کے دوران وزیر اعظم نے کیا موقف اختیار کیا۔ انہوں نے دعویٰ کیا کہ جب چینی ٹینک کیلاش رِج تک پہنچ گئے تھے تو جنرل نرونے نے وزیر دفاع راج ناتھ سنگھ سے رابطہ کیا مگر انہیں فوری جواب نہیں ملا۔ بعد میں انہیں بتایا گیا کہ ’ٹاپ‘ سے ہدایت ہے کہ اگر چینی فوج پیش قدمی کرے تو بغیر اجازت گولی نہ چلائی جائے۔

راہل گاندھی کا کہنا تھا کہ جنرل نرونے اور فوجی قیادت ٹینکوں پر کارروائی کرنا چاہتی تھی کیونکہ وہ ہندوستانی حدود میں داخل ہو چکے تھے لیکن وزیر اعظم کی جانب سے پیغام دیا گیا کہ ’جو مناسب سمجھو وہ کرو‘۔ ان کے مطابق اس کا مطلب یہ ہے کہ وزیر اعظم نے اپنی ذمہ داری پوری نہیں کی اور فیصلہ کن قیادت فراہم نہیں کی۔ انہوں نے کہا کہ جنرل نرونے نے اپنی کتاب میں لکھا ہے کہ انہوں نے اس وقت خود کو تنہا محسوس کیا کیونکہ پورا نظام ان کے ساتھ کھڑا نظر نہیں آیا۔

راہل گاندھی نے زور دے کر کہا کہ ملک کے ہر نوجوان کو اس کتاب کے بارے میں معلوم ہونا چاہیے تاکہ وہ جان سکیں کہ سرحدی بحران کے وقت کیا ہوا تھا۔ انہوں نے کہا کہ اگر وزیر اعظم ایوان میں آئیں گے تو وہ ذاتی طور پر جا کر انہیں یہ کتاب دیں گے۔

قبل ازیں، کانگریس اراکین پارلیمنٹ نے پارلیمنٹ احاطہ میں احتجاج بھی کیا۔ اراکین نے الزام عائد کیا کہ راہل گاندھی کو اہم قومی مسئلہ اٹھانے سے روکا جا رہا ہے اور اعتراض کرنے پر اپوزیشن کے ارکان کو معطل کیا جا رہا ہے۔

کانگریس کی رکن پارلیمنٹ پرینکا گاندھی واڈرا نے بھی کہا کہ پارلیمنٹ جمہوریت کا مندر ہے اور وہاں چین، پاکستان اور خارجہ پالیسی جیسے معاملات پر کھلی بحث ہونی چاہیے۔ ان کا کہنا تھا کہ اپوزیشن کی آواز دبانا جمہوری روایت کے منافی ہے اور حکومت کو مکالمہ سے گریز نہیں کرنا چاہیے۔

پارلیمنٹ میں اس معاملہ پر ہنگامہ آرائی اور سیاسی کشیدگی بدستور جاری ہے، جبکہ کانگریس نے واضح کیا ہے کہ وہ اس مسئلہ کو ایوان اور عوام دونوں کے سامنے اٹھاتی رہے گی۔