ہنگامہ کے درمیان مالیاتی بل 2023 کو پارلیمنٹ سے ملی منظوری، مالی سال 24-2023 کے بجٹ کا عمل مکمل

گزشتہ دنوں لوک سبھا میں زبردست ہنگامہ کے درمیان ووٹنگ کے ذریعہ مالیاتی بل 2023 کو پاس کیا گیا تھا، اور آج راجیہ سبھا میں بھی اس بل کو زوردار ہنگامہ کے درمیان منظوری مل گئی۔ راجیہ سبھا میں مالیاتی بل 2023 کو بغیر بحث کے صوتی ووٹوں سے منظور کر لوک سبھا کو بھیج دیا۔ اس کے ساتھ ہی آئندہ مالی سال کے بجٹ کا عمل ایوانِ بالا میں مکمل ہو گیا۔

ایوان بالا کی میٹنگ آج ایک بار ملتوی ہونے کے بعد دوپہر 2 بجے شروع ہوئی تو چیئرمین جگدیپ دھنکھڑ نے کہا کہ صبح جو ضروری دستاویز ایوان کے سامنے نہیں رکھے جا سکے تھے، انھیں رکھا گیا مان لیا جائے۔ اسی درمیان کانگریس سمیت اپوزیشن پارٹیوں کے کئی اراکین اڈانی گروپ سے جڑے الزامات کی جانچ کے لیے جے پی سی (جوائنٹ پارلیمانی کمیٹی) تشکیل دیئے جانے کا مطالبہ لے کر ہنگامہ کرنے لگے۔ ہنگامہ کے درمیان ہی وزیر مملکت برائے مالیات پنکج چودھری نے مالیاتی سال 24-2023 کے لیے مرکز کے زیر انتظام خطہ جموں و کشمیر کے جنرل بجٹ، گرانٹ کے ضمنی مطالبات اور اس سے متعلق اختصاصی بل کو صوتی ووٹ سے لوک سبھا کو لوٹا دیا۔

اس کے بعد چیئرمین دھنکھڑ کی اجازت سے وزیر مالیات نرملا سیتارمن نے مالیاتی بل 2023 کو ایوان میں پیش کیا۔ اس دوران ایوان میں اپوزیشن اراکین کا ہنگامہ جاری تھا۔ ہنگامے کے درمیان ہی مالیاتی بل 2023 کو بغیر بحث کے صوتی ووٹ سے لوک سبھا کو لوٹا دیا گیا۔ مالیاتی بل کو لوک سبھا کو لوٹائے جانے کے ساتھ ہی ایوان میں مالی سال 24-2023 کے بجٹ کا عمل مکمل ہو گیا۔

بعد ازاں راجیہ سبھا چیئرمین جگدیپ دھنکھڑ نے مالیاتی بل پر ایوان میں بحث کے لیے مقرر کردہ 10 گھنٹے کا اراکین کے ذریعہ استعمال نہ کرنے کو ’افسوسناک‘ بتایا۔ بہرحال، لوک سبھا میں یکم فروری کو وزیر مالیات نرملا سیتارمن کے ذریعہ عام بجٹ 24-2023 پیش کیے جانے کے ساتھ بجٹ کا جو عمل شروع ہوا تھا وہ آج ختم ہو گیا۔ ایوانِ زیریں میں مالیاتی بل 2023، 24 مارچ کو پاس ہوا تھا۔