پہلگام حملہ: دہشت گردوں کو سخت سزا دی جائے، حکومت تمام جماعتوں سے بات کرے، ملکارجن کھڑگے کا مطالبہ

نئی دہلی: جموں و کشمیر کے سیاحتی مقام پہلگام میں ہوئے حملے کی ملکی اور عالمی سطح پر جاری مذمت کے درمیان کانگریس کے قومی صدر ملکارجن کھڑگے نے اس وحشیانہ کارروائی پر سخت ردعمل ظاہر کیا ہے۔ انہوں نے مطالبہ کیا ہے کہ اس حملے میں ملوث عناصر کو سخت ترین سزا دی جائے اور بے گناہ متاثرین کو انصاف فراہم کیا جائے۔

ملکارجن کھڑگے نے بدھ کی صبح ایکس (سابق ٹوئٹر) پر اپنے پیغام میں کہا، ’’گزشتہ رات میں نے مرکزی وزیر داخلہ امت شاہ، جموں و کشمیر کے وزیراعلیٰ عمر عبداللہ اور ریاستی کانگریس کے سینئر رہنماؤں سے پہلگام میں ہوئے اس ہولناک قتل عام پر بات کی۔ اس بزدلانہ دہشت گرد حملے میں ملوث تمام عناصر کو کیفر کردار تک پہنچایا جانا چاہیے۔‘‘

انہوں نے کہا، موجودہ حالات میں تمام فریقوں کو متحد ہو کر کام کرنے کی ضرورت ہے۔ یہ وقت ہے کہ ہم سیاسی اختلافات کو بالائے طاق رکھتے ہوئے قوم کے تحفظ کے لیے متحد ہوں۔ سرحد پار سے ہونے والے اس حملے کا مضبوط اور مؤثر جواب دیا جانا چاہیے۔‘‘

ملکارجن کھڑگے نے مرکزی حکومت سے اپیل کی کہ جموں و کشمیر میں امن و امان برقرار رکھنے کے لیے تمام سیاسی جماعتوں سے بات چیت کی جائے۔ انہوں نے کہا کہ حکومت کو چاہیے کہ وہ ریاست میں سیاحوں کی حفاظت کو یقینی بنانے کے لیے ہر ممکن قدم اٹھائے۔

قابل ذکر ہے کہ منگل کو اننت ناگ ضلع کے پہاڑی سیاحتی مقام پہلگام میں دہشت گردوں نے ایک بزدلانہ حملہ کیا، جس میں دو غیر ملکیوں سمیت کم از کم 26 سیاح مارے گئے جبکہ 20 دیگر افراد زخمی ہوئے۔ ذرائع کے مطابق ہلاکتوں کی تعداد میں اضافہ ہو سکتا ہے۔

اس حملے کے بعد مرکزی وزیر داخلہ امت شاہ نے فوری طور پر صورتحال کا جائزہ لیا اور منگل کی رات تقریباً 8:20 بجے دہلی سے سری نگر پہنچے۔ ایئرپورٹ پر لیفٹیننٹ گورنر منوج سنہا، ڈی جی پی اور دیگر اعلیٰ حکام کے ساتھ وزیراعلیٰ عمر عبداللہ نے وزیر داخلہ کو صورتحال سے آگاہ کیا۔

امت شاہ نے راج بھون میں اعلیٰ سطحی سکیورٹی اجلاس کی صدارت کی اور بدھ کے روز وہ زخمیوں کی عیادت کے لیے سری نگر کے اسپتال کا دورہ کریں گے۔ اس کے علاوہ وہ حملے کی جگہ کا بھی جائزہ لیں گے۔ پہلگام حملے کے بعد وادی میں سیکورٹی فورسز کو الرٹ کر دیا گیا ہے اور بڑے پیمانے پر سرچ آپریشن جاری ہے۔ مرکزی اور ریاستی حکومتیں اس حملے کے خلاف مشترکہ کارروائی کی تیاریوں میں مصروف ہیں۔