’نتیش راج‘ میں تھانیدار کو چاہیے رشوت، یتیم کو مانگنی پڑی بھیک

بہار کے ویشالی ضلع میں ایک ایسا معاملہ سامنے آیا ہے جس نے وزیر اعلیٰ نتیش کمار کے ’سُشاسن‘ کے دعوؤں کی قلعی کھول کر رکھ دی ہے۔ ویشالی ضلع میں ایک یتیم بچے کو اپنی زمین بچانے کے لیے بھیک مانگنی پڑ رہی ہے کیونکہ جب وہ مدد کے لیے اسسٹنٹ تھانہ انچارج کے پاس پہنچا تو اس نے رشوت کا مطالبہ کیا۔

ضلع صدر دفتر حاجی پور کے ڈسٹرکٹ مجسٹریٹ آفس کے سامنے جمعہ یعنی 20 اپریل کو جب ایک یتیم بچے کو گلے میں تختی لگا کر بھیک مانگتے دیکھا گیا تو حقیقت سب پر عیاں ہوئی۔ جس وقت بچہ بھیک مانگ رہا تھا اس وقت اس کے گھر والے بھی موجود تھے۔

کٹہرا کے چہراکلا گاؤں کا رہنے والا بچہ یتیم ہے اور اس کے پاس والدین کی ایک اکڑ سے زیادہ زمین ہے۔ بچے کے مطابق اس کی زمین پر گاؤں کے ہی کچھ دبنگوں نے تعمیرات کا کام شروع کر دیا ہے۔ اس بات کی شکایت کرنے جب وہ کٹہرا کے اسسٹنٹ تھانہ انچارج کے پاس پہنچا تو انھوں نے دس ہزار روپے رشوت کا مطالبہ کیا۔ بچے نے بتایا کہ ’’میرے پاس اتنی بڑی رقم نہیں تھی اور یہی وجہ ہے کہ لوگوں سے مدد مانگ کر روپے جمع کرنے لگا۔‘‘

اس بات کی اطلاع جب ضلع مجسٹریٹ کو ملی تو انھوں نے بچے کو اپنے پاس بلایا۔ انچارج مجسٹریٹ پربھو نارائن یادو نے بتایا کہ معاملے کی جانچ مہوا ڈویژنل افسر، ڈپٹی سپرنٹنڈنٹ آف پولس اور ڈویژنل افسر کی ہدایت میں کرائی جا رہی ہے۔ انھوں نے کہا کہ جو بھی قصوروار پایا جائے گا اس کے خلاف کارروائی ہوگی۔

دوسری طرف کٹہرا اسسٹنٹ تھانہ انچارج راکیش رنجن رشوت مانگنے کے الزام کو بے بنیاد بتا رہے ہیں۔ انھوں نے کہا کہ بچے کو اس کے سرپرست مہندر رائے کے سپرد کر دیا گیا ہے۔ مہندر رائے نے بتایا کہ عدالت کے ذریعہ زمین پر کسی بھی طرح کی تعمیرات سے منع کیا گیا ہے لیکن کچھ لوگوں نے زمین پر تعمیر کا کام شروع کر دیا ہے۔