’آپریشن ترشول‘ اختتام پذیر، دھماکوں سے گونج اٹھا مغربی راجستھان کا آسمان

مغربی راجستھان کے ریگستانی علاقوں میں منگل (11 نومبر) کو دن بھر جنگ جیسی صورتحال رہی۔ جیسلمیر، جالور اور باڑمیر اضلاع میں فوج اور فضائیہ کے جانبازوں نے مشترکہ فوجی مشقوں کے دوران زبردست جنگی مہارت اور ہم آہنگی کا مظاہرہ کیا۔ آسمان میں دھماکوں کی گونج اور زمین سے اٹھتے ہوئے دھوئیں و ریت کے غباروں نے حقیقی طور پر جنگ کا احساس دلا دیا۔

جیسلمیر ضلع کے سیالو کا تلا علاقہ میں فوج کے جوانوں نے جنگ جیسا منظر بنایا۔ اس دوران مشق میں دکھایا گیا کہ کہ دشمن فوجیوں نے ہندوستان کی اگلی چوکیوں پر قبضہ کر لیا تھا۔ اس کے بعد ہندوستانی فوج اور فضائیہ نے جوابی حملہ کر انہیں پیچھے ہٹنے پر مجبور کر دیا۔ قوت کا یہ مظاہرہ ’آپریشن ترشول‘ کے اختتام کے موقع پر کیا گیا۔ اسی طرح مارو جوالا مشق کے دوسرے مرحلہ میں ٹینکوں سے داغے گئے گولوں نے دشمن کے ٹھکانوں کو پلک جھپکتے ہی تباہ کر دیا۔ تقریباً 12500 فٹ کی اونچائی سے پیرا ٹروپنگ کر اترے فوجیوں نے گولوں اور بموں کی برسات کر دشمنوں کو پسپا کر دیا۔

فوج کی ساتویں پیرا ٹیم کے جوانوں نے یہ ثابت کر دیا کہ ہندوستانی فوج کے لیے بری، بحری اور فضائی تینوں ہی راستوں میں کوئی بھی رکاوٹ ناقابل رسائی نہیں ہے۔ فضائیہ کے سی-295 ٹرانسپورٹ طیارہ سے پیرا کمانڈوز نے اونچائی سے پیرا شوٹ کے سہارے چھلانگ لگا کر وار زون میں اترنے کا شاندار کارنامہ انجام دیا۔

اسی دوران سرحدی ضلع جالور کے چتلوانا اور باڑمیر کے باکھاسر علاقہ میں ہندوستانی فضائیہ نے ’مہاراج‘ نام سے خصوصی فوجی مشق کیا۔ جنگی طیارہ جیگوار اور سکھوئی-30 نے بھارت مالا ایکسپریس وے-925 اے کی 3 کلومیٹر طویل ایمرجنسی ایئر اسٹرپ پر لینڈنگ اور ٹیک آف کر اپنی حکمت عملی کا مظاہرہ کیا۔ ٹرائل کی شروعات سی-295 ٹرانسپورٹ ایئر کرافٹ کی ٹچ اینڈ گو مشق سے ہوئی، جس کے بعد جیگوار اور سکھوئی طیاروں نے اپنی طاقت کا مظاہرہ کیا۔ مشق کے دوران ہائی وے پر ٹریفک مکمل طور سے بند رہی، جبکہ سیکورٹی اور بھیڑ کو کنٹرول کرنے کے لیے پولیس اور انتظامی ٹیمیں مستعدی کے ساتھ تعینات رہیں۔

ونگ کمانڈر دیویندر پانڈے نے بتایا کہ یہ مشق ساؤتھ ویسٹرن کمانڈ کے تحت منعقد کیا گیا۔ اس کا بنیادی مقصد ایمرجنسی ایئر لینڈنگ فیلڈ کی درستگی اور استعمال کی جانچ کرنا تھا۔ فائٹر جیٹس کی گرج سے آسمان گونج اٹھا اور آس پاس موجود لوگوں کے چہروں پر حب الوطنی کا جوش نظر آنے لگا۔