یکم مئی سے نافذ ہوگا ’ایک ریاست، ایک آر آر بی‘، علاقائی دیہی بینکوں کی تعداد 43 سے گھٹ کر ہو جائے گی 28

یکم مئی سے ملک کی ہر ایک ریاست میں صرف ایک ریجنل رورل بینک (آر آر بی) ہوگا۔ اس تجویز کو نافذ کرنے کے لیے وزارت خزانہ نے 11 ریاستوں میں 15 علاقائی دیہی بینکوں کے انضمام کے حوالے سے ایک نوٹیفکیشن جاری کر دیا ہے۔ وزارت خزانہ کے نوٹیفکیشن کے مطابق ملک کے جن 11 ریاستوں کے علاقائی دیہی بینکوں کو انضمام کیا جائے گا ان میں آندھرا پردیش، اتر پردیش، بنگال، بہار، گجرات، جموں و کشمیر، کرناٹک، مدھیہ پردیش، مہاراشٹر، اڈیشہ اور راجستھان شامل ہیں۔ علاقائی دیہی بینکوں کے انضمام کا یہ چوتھا مرحلہ ہوگا، جس کے مکمل ہوتے ہی آر آر بی کی موجودہ تعداد 43 سے کم ہو کر 28 رہ جائے گی۔ اس طرح ’ایک ریاست، ایک آر آر بی‘ کا ہدف حاصل ہو جائے گا۔

نوٹیفکیشن کے مطابق ان علاقائی دیہی بینکوں کے انضمام کی مؤثر تاریخ یکم مئی 2025 مقرر کی گئی ہے۔ علاقائی دیہی بینک ایکٹ، 1976 کے سیکشن 23اے(1) کے تحت دیے گئے اختیارات کے تحت یہ آر آر بی ایک ادارے میں ضم ہو جائیں گے۔ اسی سلسلے میں یونین بینک آف انڈیا، کینرا بینک، انڈین بینک اور اسٹیٹ بینک آف انڈیا کی جانب سے اسپانسر شدہ چیتنیہ گوداوری گرامینا بینک، آندھرا پرگتی گرامینا بینک، سپتگیری گرامینا بینک اور آندھرا پردیش گرامینا وکاس بینک کو آندھرا پردیش گرامینا بینک کے طور پر ضم کر دیا جائے گا۔

اترپردیش اور بنگال میں موجود تینوں آر آر بی کو بھی ایک یونٹ میں ضم کر دیا جائے گا۔ اترپردیش میں موجود بڑودہ یوپی بینک، آریاورت بینک اور پرتھما یوپی گرامین بینک کو اترپردیش گرامین بینک نام کے ادارے میں ضم کر دیا جائے گا، جس کا صدر دفتر بینک آف بڑودہ کے تحت لکھنؤ میں ہوگا۔ بنگال میں چلنے والے بنگیا گرامین وکاس، مغربی بنگال گرامین بینک اور اتربنگا علاقائی دیہی بینک کو مغربی بنگال گرامین بینک میں ضم کر دیا جائے گا۔

اس کے علاوہ ملک کی 8 ریاستوں بہار، گجرات، جموں و کشمیر، کرناٹک، مدھیہ پردیش، مہاراشٹر، اڈیشہ اور راجستھان میں 2 آر آر بی کو ایک ساتھ ضم کر دیا جائے گا۔ جنوبی بہار گرامین بینک اور شمالی بہار گرامین بینک کو ضم کر کے بہار گرامین بینک بنایا جائے گا، جس کا صدر دفتر پٹنہ میں ہوگا۔ گجرات میں بڑودہ گجرات گرامین بینک اور سوراشٹر گرامین بینک کو ضم کر کے گجرات گرامین بینک بنایا جائے گا۔ نوٹیفکیشن کے مطابق تمام علاقائی دیہی بینکوں کے پاس 2000 کروڑ روپے کا مجاز سرمایہ ہوگا۔