برفیلی ہواؤں سے کانپ اُٹھا شمالی ہندوستان! دہلی میں رواں موسم کا سب سے کم درجہ حرارت درج

شمالی ہندوستان اس وقت سرد لہر کی زد میں ہے۔ کئی ریاستوں میں درجہ حرارت معمول سے کافی نیچے چلا گیا ہے جس سے عام زندگی درہم برہم ہو رہی ہے۔ اتراکھنڈ اور ہماچل پردیش میں ہورہی برف باری کے بعد وہاں سے چلنے والی سرد ہوائیں دہلی اور شمالی ہندوستان میں لوگوں کو شدید سردی کا احساس دلا رہی ہیں۔ محکمہ موسمیات (آئی ایم ڈی) کے مطابق آئندہ چند روز تک سردی سے راحت ملنے کی کوئی امید نہیں ہے اور کئی علاقوں میں سرد لہر سے شدید سردی کا سامنا کرنا پڑ سکتا ہے۔

قومی راجدھانی دہلی میں اس برس موسم کی پہلی سرد لہر درج کی گئی ہے۔ رواں موسم میں پہلی بار کم سے کم درجہ حرارت 2.9 ڈگری سیلسیس تک گر گیا۔ محکمہ موسمیات کے مطابق جب کم سے کم درجہ حرارت معمول سے 4.5 سے 6.4 ڈگری سے نیچے چلا جاتا ہے تواسے سرد لہرکہا جاتا ہے۔ موجودہ اعداد و شماراس بات کی تصدیق کرتے ہیں کہ دہلی کے بیشتر حصوں میں یہی صورتحال ہے۔ آیا نگر دہلی کا سب سے سرد علاقہ رہا جہاں کم از کم درجہ حرارت 2.9 ڈگری سیلسیس ریکارڈ کیا گیا۔

وہیں راجدھانی کے پالم ویدر اسٹیشن نے کم از کم درجہ حرارت 3.0 ڈگری سیلسیس ریکارڈ کیا جو13 برسوں میں سب سے کم درجہ حرارت ہے۔ آئی ایم ڈی کے مطابق صفدرجنگ آبزرویٹری میں کم سے کم درجہ حرارت 4.8 ڈگری سیلسیس رہا، جو معمول سے 2.6 ڈگری کم ہے، جب کہ زیادہ سے زیادہ درجہ حرارت 18.8 ڈگری سیلسیس ریکارڈ کیا گیا تھا۔ محکمہ موسمیات نے ’یلو الرٹ‘ جاری کرتے ہوئے آئندہ دو روز تک سردی کی شدت برقرار رہنے کی وارننگ دی ہے۔

اسی طرح راجستھان میں بھی شدید سردی پڑ رہی ہے۔ ریاست کے کئی حصوں میں سرد لہر سے شدید سرد لہرکی صورتحال درج کی گئی ہے۔ پرتاپ گڑھ میں کم سے کم درجہ حرارت 0.2 ڈگری سیلسیس تک گر گیا، جب کہ باڑمیر میں 0.1 ڈگری سیلسیس ریکارڈ کیا گیا۔ پیلانی میں 1.2 ڈگری، سیکر میں 1.7 ، لنکرانسر میں 1.9 اور چورو اور جھنجھنو میں 2 ڈگری سیلسیس ریکارڈ کیا گیا۔ محکمہ موسمیات نے آئندہ چند روز تک ریاست میں شدید سردی کی پیش گوئی کی ہے۔

اُدھر پنجاب کے بھٹنڈہ میں کم سے کم درجہ حرارت 1.6 ڈگری سیلسیس اور ہریانہ کے حصار میں 2.2 ڈگری سیلسیس درج کیا گیا۔ لدھیانہ، پٹیالہ، امرتسر اور گرداسپور میں بھی درجہ حرارت معمول سے کم رہا۔ جموں و کشمیر میں سردی خطرناک شکل اختیار کرچکی ہے۔ یہاں درجہ حرارت انجماد سے کئی ڈگری نیچے چلا گیا ہے۔ سری نگر میں کم سے کم درجہ حرارت 0.5.2 ڈگری سیلسیس ریکارڈ کیا گیا جبکہ جنوبی کشمیر کے شوپیاں میں یہ 0.86 ڈگری سیلسیس رہا۔ پہلگام میں بھی درجہ حرارت 0 سے 7.6 ڈگری تک نیچے درج کیا گیا۔ وادی کشمیر میں اس وقت ’چِلّا کلاں‘ کا دور جاری ہے جب 40 دنوں تک کڑاکے کی ٹھنڈ اوربرف باری کا اندیشہ رہتا ہے۔