نوئیڈا میں بغیر اجازت کرسمس اور نئے سال کی پارٹی پر پابندی عائد، انتظامیہ نے جاری کی گائیڈلائن

نوئیڈا میں کرسمس اور نئے سال کے موقع پر ہونے والی تقریبات کے پیش نظر انتظامیہ نے نئی گائیڈلائن جاری کی ہے۔ ہجوم اور سیکورٹی کے خدشات اور گزشتہ سالوں میں سامنے آنے والی بدانتظامی کو دیکھتے ہوئے ڈی ایم میدھا روپم نے پیشگی اجازت کے بغیر کسی بھی قسم کی پارٹی یا عوامی تقریب پر پابندی عائد کر دی ہے۔ انتظامیہ نے واضح کر دیا ہے کہ کرسمس اور نئے سال کے دوران ہونے والے ہر پروگرام کے لیے پہلے سے اجازت لینا لازمی ہوگا، ورنہ منتظمین کے خلاف سخت کارروائی کی جائے گی۔

ضلع مجسٹریٹ کی جانب سے جاری گائیڈلائن کے مطابق ہوٹل، پب، ریسٹورنٹ، کلب، پارک، میرج لان، فارم ہاؤس اور دیگر عوامی مقامات پر منعقد ہونے والے تمام تفریحی پروگرام انتظامیہ کی اجازت کے بغیر منعقد نہیں کیے جا سکیں گے۔ ڈی ایم نے وارننگ دی ہے کہ بغیر اجازت کے منعقد ہونے والے کسی بھی پروگرام کو موقع پر ہی بند کر دیا جائے گا۔ اس کے ساتھ ہی منتظمین پر قانونی کارروائی بھی کی جا سکتی ہے۔

انتظامیہ نے یہ بھی واضح کیا ہے کہ اجازت لینے کے عمل کو آسان اور شفاف بنایا گیا ہے۔ منتظمین کو دفاتر کے چکر لگانے کی ضرورت نہیں ہوگی۔ اس کے لیے ’نویش مِترا پورٹل‘ کے ذریعہ سے آن لائن درخواست دی جا سکتی ہے۔ متعلقہ محکموں کی جانب سے درخواست کی جانچ کے بعد ہی پروگرام کی اجازت دی جائے گی۔ انتظامیہ کا مقصد یہ یقینی بنانا ہے کہ تمام تقریبات قوانین کے دائرے میں، محفوظ اور منظم طریقے سے مکمل ہوں۔

کرسمس اور نئے سال کے دوران لا اینڈ آرڈر برقرار رکھنے کے لیے انتظامیہ نے پورے ضلع میں خصوصی ٹیمیں تشکیل دی ہیں۔ یہ ٹیمیں مختلف علاقوں میں مسلسل گشت اور معائنہ کریں گی۔ اگر کسی جگہ پر بغیر اجازت پارٹی، ڈی جے، جھولے، میلہ یا دیگر تفریحی سرگرمیاں ہوتی ہوئی پائی گئیں تو انہیں فوراً بند کر دیا جائے گا۔ ساتھ ہی منتظمین کے خلاف قوانین کے مطابق کارروائی بھی کی جائے گی۔

ڈی ایم میدھا روپم نے کہا کہ اس طرح کے بڑے بڑے پروگراموں میں آگ لگنے، بھگدڑ، بدانتظامی اور دیگر حادثات کے خدشات برقرار رہتے ہیں۔ ان ہی وجوہات کے مدنظر انتظامیہ نے سختی برتنے کا فیصلہ کیا ہے۔ ان کا کہنا ہے کہ منتظمین کو فائر سیفٹی، برقی تحفظ، لا اینڈ آرڈر اور عوامی نظم و ضبط سے متعلق تمام گائیڈلائنز پر عمل کرنا لازمی ہوگا۔

میدھا روپم نے یہ بھی ہدایت دی ہے کہ تقریب کی جگہ پر بجلی کی فٹنگ، ایئرکنڈیشننگ کا نظام، فائر سیفٹی اور ایمرجنسی گیٹ کے انتظامات درست ہونے چاہیے۔ ان تمام انتظامات سے متعلق سرٹیفکیٹ متعلقہ محکموں سے حاصل کر انتظامیہ کے سامنے پیش کرنے ہوں گے۔ ساتھ ہی انتظامیہ نے عام لوگوں اور منتظمین سے گزارش کی ہے کہ وہ قوانین کی پاسداری کریں اور محفوظ طریقے سے کرسمس اور نئے سال کا جشن منائیں۔ تاکہ کسی بھی طرح کے ناخوشگوار واقعے سے بچا جا سکے اور تہوار پرامن ماحول میں مکمل ہو سکے۔