تہاڑ جیل میں خواجہ سراؤں نے رکن پارلیمنٹ انجینئر رشید کے ساتھ مار پیٹ کی

جموں و کشمیر کے بارہمولہ سے رکن پارلیمنٹ اور عوامی اتحاد پارٹی (اے آئی پی) کے سربراہ انجینئر رشید اس وقت تہاڑ جیل نمبر 3 میں بند ہیں۔ تقریباً سات آٹھ روز  پہلے ان کی جیل نمبر 3 میں بند خواجہ سراؤں کے ساتھ لڑائی ہوئی تھی۔ اس کے بعد خواجہ سراؤں نے رشید کی پٹائی کی۔ بتایا جا رہا ہے کہ اس لڑائی میں رشید کو معمولی چوٹیں آئیں۔ واضح رہےتہاڑ جیل کے اندر جیل نمبر 3 میں خواجہ سرا قیدیوں کو رکھا جاتا ہے۔ فی الحال اس بیرک میں صرف تین خواجہ سرا قید ہیں۔

جیل ذرائع نے واضح کیا ہے کہ انجینئر رشید کو قتل کرنے کا کوئی منصوبہ نہیں بنایا گیا، ایسی خبریں سراسر بے بنیاد ہیں۔ واضح رہے  کہ عوامی اتحاد پارٹی (اے آئی پی) نے اس واقعے کو قتل کی سازش قرار دیتے ہوئے جیل انتظامیہ پر سنگین الزامات عائد کیے ہیں۔

اے آئی پی کے مطابق ایک حالیہ قانونی میٹنگ میں انجینئر رشید نے اپنے وکیل ایڈووکیٹ جاوید حبیب کو بتایا کہ کشمیری قیدیوں پر تشدد کرنے کے لیے تہاڑ جیل کے اہلکار جان بوجھ کر خواجہ سراؤں کو ان کی بیرکوں میں رکھ رہے ہیں اور جنہیں کشمیری قیدیوں پر حملے اور اشتعال دلانے کے لیے استعمال کیا جا رہا ہے۔

ایڈوکیٹ حبیب نے بتایا کہ انجینئر رشید نے انکشاف کیا ہے کہ تہاڑ جیل کے اہلکار کشمیری قیدیوں کو ہراساں کرنے کے لیے نت نئے حربے استعمال کرتے ہیں۔ ان کے مطابق مرد خواجہ سرا قیدیوں کو جان بوجھ کر ان بیرکوں میں رکھا جاتا ہے، تاکہ ماحول خراب ہو اور لڑائی جھگڑے ہوسکیں۔ حبیب نے بتایا کہ ایک بار خواجہ سرا قیدیوں نے رشید کو دھکا دے کران پر  گیٹ گرانے کی کوشش کی تھی جس سے وہ بال بال بچ گئے۔ انہوں نے اسے دانستہ قاتلانہ سازش قرار دیا۔

انجینئر رشید کے مطابق تہاڑ جیل میں مرد خواجہ سرا قیدیوں نے پہلے بیرواہ کے ایوب پٹھان، کمار واڑی کے بلال میر اور سری نگر کے امیر گوجری پر حملہ کیا۔ انہوں نے الزام لگایا کہ کشمیری قیدی صابر ہیں لیکن جیسے ہی وہ نماز پڑھنا شروع کرتے ہیں انہیں جان بوجھ کر اکسایا جاتا ہے اور ہراساں کیا جاتا ہے۔

اے آئی پی نے گہری تشویش کا اظہار کرتے ہوئے کہا کہ تہاڑ جیل کی صورتحال بہت سنگین ہے۔ پارٹی نے مطالبہ کیا ہے کہ اس معاملے کی آزادانہ انکوائری کرائی جائے، جیل حکام کو جوابدہ ٹھہرایا جائے اور انجینئر رشید سمیت تمام کشمیری قیدیوں کے تحفظ اور عزت کی فوری ضمانت دی جائے۔ (بشکریہ نیوز پورٹل ’آج تک‘)