’شادی صرف ساتھ رہنے کا نام نہیں‘، طلاق کے فیصلے پر دہلی ہائی کورٹ کا سخت تبصرہ

دہلی ہائی کورٹ نے اپنے ایک اہم فیصلے میں بیوی کی اس اپیل کو خارج کر دیا جس میں اس نے اپنے خلاف طلاق کے فیصلے کو چیلنج کیا تھا۔ عدالت نے واضح طور پر کہا کہ شادی صرف ساتھ رہنے کا  نام نہیں ہے بلکہ اعتماد، وفاداری اور شفافیت اس کی بنیاد ہے۔ بیوی کے مسلسل مشکوک رویے اور جوابات کے بحران نے ازدواجی رشتے میں اعتماد کو توڑنے کا کام کیا جو ذہنی ظلم کے دائرے میں آتا ہے۔

معاملے میں شوہر نے الزام لگایا تھا کہ بیوی کے دو مختلف مردوں کے ساتھ ناجائز تعلقات رکھتی تھی اور رات بھر ان سے متی تھی۔ بیوی نے ان ملاقاتوں کو محض پروفیشنل رشتہ بتایا لیکن عدالت میں وہ اپنے دعوے کی حمایت میں کوئی ٹھوس دستاویز نہیں پیش کرسکی۔ اس کے علاوہ کوئی معاہدہ، بل یا ای میلز بھی نہیں تھے جو یہ ثابت کریں کہ تعلقات صرف خالصتاً پیشہ ورانہ تھے۔

فیملی کورٹ نے بیوی سے پوچھا کہ وہ رات گئے تک دونوں افراد سے کہاں اور کیوں ملیی تھی۔ اس کے جواب میں اس نے بار بار کہا کہ وہ بتا نہیں سکتی یا بیان نہیں کر سکتی۔ ہائی کورٹ نے بھی تسلیم کیا کہ ایک عام آدمی یہ کیسے بھول سکتا ہے کہ اس نے کسی خاص شخص کے ساتھ رات کہاں گزاری؟۔ عدالت نے کہا کہ اس طرح کے جوابات سے فطری طور پر شک پیدا ہوتا ہے اور بیوی شک دور کرنے میں ناکام رہی۔

جسٹس انل کھیترپال اور جسٹس ہریش ویدیا ناتھن شنکر کی بنچ نے کہا کہ بے وفائی ہمیشہ براہ راست ثبوت سے ثابت نہیں ہوتی۔ بعض اوقات حالات، طرز عمل اور مسلسل چھپانا ذہنی ظلم کے لیے کافی ہوتے ہیں۔ عدالت نے کہا کہ جب کسی رشتے میں ایسا برتاؤ ہو جوخوف، شک اور جذباتی خیانت پیدا کرے اور ملزم فریق واضح طور پر انیں دور نہ کر سکے تو یہ ذہنی ظلم سمجھا جائے گا۔ عدالت نے یہ بھی کہا کہ جذباتی بے وفائی اتنی ہی سنگین ہے جتنی جسمانی بے وفائی کیونکہ یہ رشتے میں اعتماد کی بنیاد کو توڑ دیتی ہے۔