مہاراشٹر: فارم ہاؤس میں لگی خوفناک آگ، 40 منٹ میں جل کر خاک ہو گیا احاطہ کا بڑا حصہ

مہاراشٹر کے ناگپور سے تقریباً 55 کلومیٹر دور کونڈھالی کے چندن پارڈی گاؤں کے قریب ایک فارم ہاؤس میں جمعرات کو اچانک بھیانک آگ لگ گئی۔ آگ اتنی تیزی سے پھیلی کہ تقریباً 40 منٹ کے اندر فارم ہاؤس کا بیشتر حصہ جل کر خاک ہو گیا۔ اطمینان کی بات یہ رہی کہ جس وقت آگ لگی، اس وقت فارم ہاؤس کے اندر کوئی موجود نہیں تھا۔

یہ واقعہ کونڈھالی پولیس تھانہ علاقے کا ہے۔ چندن پارڈی گاؤں کے قریب تالاب کے کنارے ایک فارم ہاؤس بنا ہوا ہے۔ جمعرات کی صبح یہاں اچانک آگ لگ گئی۔ کچھ ہی دیر میں آگ نے پورے فارم ہاؤس کو اپنی زد میں لے لیا۔ آگ کے شعلے دیکھ کر آس پاس کے دیہاتیوں میں ہلچل مچ گئی۔ دیہاتیوں نے فوراً اس کی اطلاع کونڈھالی پولیس کو دی۔ اطلاع ملتے ہی پولیس نے فائر بریگیڈ کو موقع پر بھیجا۔

میڈیا رپورٹس کے مطابق کونڈھالی نگر پنچایت کی فائر بریگیڈ کی ٹیم جائے وقوع پر پہنچی اور آگ بجھانے کا کام شروع کیا، لیکن تب تک آگ کافی پھیل چکی تھی۔ تقریباً 40 منٹ کے اندر فارم ہاؤس کا بیشتر حصہ جل چکا تھا۔ آگ اتنی بھیانک تھی کہ فائر بریگیڈ کے پہنچنے تک کافی نقصان ہو چکا تھا۔ فارم ہاؤس تالاب کے کنارے ہونے کے باوجود آگ پر قابو پانے میں کافی مشقت کرنی پڑی۔

کونڈھالی پولیس تھانہ انچارج انسپکٹر سُمت پرتیکے کے مطابق فارم ہاؤس ناگپور کے رہنے والے پاٹل نامی شخص کا بتایا جا رہا ہے۔ ابتدائی طور پر آگ لگنے کی وجہ شارٹ سرکٹ بتائی جا رہی ہے۔ تاہم پولیس آگ لگنے کی وجہ کی تحقیقات کر رہی ہے۔ یہ پتہ لگانے کی کوشش کی جا رہی ہے کہ آخر آگ کس وجہ سے لگی۔ حادثے میں سب سے بڑی راحت کی بات یہی رہی کہ آگ لگنے کے وقت فارم ہاؤس میں کوئی موجود نہیں تھا۔ اس لیے اس واقعے میں کسی کے زخمی ہونے یا جان جانے کی اطلاع نہیں ہے۔ اب پولیس اور متعلقہ محکمے آگ سے ہوئے مالی نقصانات کا جائزہ لے رہے ہیں اور آگ لگنے کی اصل وجہ کی تحقیقات بھی کر رہے ہیں۔