مہاراشٹر: بی ایم سی انتخاب میں اکیلے میدان میں اتریں گے اجیت پوار

برہن ممبئی میونسپل کارپوریشن (بی ایم سی) کو لے کر مہاراشٹر میں سیاسی ہلچل تیز ہو گئی ہے۔ اسی درمیان ریاست کے نائب وزیر اعلیٰ اجیت پوار نے ایک بیان دے کر ریاست کے سیاسی پارے کو مزید ہائی کر دیا ہے۔ انہوں نے مہایوتی کے ساتھ انتخاب لڑنے کے سوال پر صاف طور پر کہا ہے کہ آئندہ میونسپلٹی انتخاب میں حالات اور مطالبات کے پیش نظر اس پر فیصلہ لیں گے۔

پونے میں میڈیا سے بات چیت کے دوران اجیت پوار نے کہا کہ ’’ہم نے اسمبلی اور پارلیمانی انتخاب مہایوتی کے ساتھ مل کر لڑا تھا، لیکن آئندہ بلدیاتی انتخاب کے لیے ہم حالات اور مطالبات کے پیش نظر فیصلہ لیں گے۔‘‘ دوسری جانب مہایوتی کی حلیف جماعتیں بی جے پی اور ایکناتھ شندے کی قیادت والی شیو سینا کے لیڈران کہتے رہے ہیں کہ سب ایک ساتھ مل کر بی ایم سی کا انتخاب لڑیں گے۔

گزشتہ ماہ اگست میں مہاراشٹر کے بی جے پی لیڈر سنجے اپادھیائے نے دعویٰ کیا تھا کہ بی ایم سی میں میئر مہایوتی سے ہی ہوگا۔ ساتھ ہی انہوں نے کہا تھا کہ ’’وزیر اعظم مودی کی قیادت اور وزیر اعلیٰ دیویندر فڑنویس کی رہنمائی میں بی جے پی، مہایوتی اتحاد کے ساتھ مل کر انتخاب لڑے گی۔ اتحاد کی طاقت اور حکمت عملی کی بنیاد پر بی ایم سی میں میئر کا عہدہ مہایوتی کے پاس آئے گا۔‘‘

مہاراشٹر کے نائب وزیر اعلیٰ ایکناتھ شندے نے بھی گزشتہ ماہ دعویٰ کیا تھا کہ مہایوتی میں شامل پارٹیاں ساتھ مل کر بلدیاتی انتخاب لڑیں گی۔ شندے کا بھی کہنا تھا کہ بی ایم سی انتخاب میں مہایوتی کی جیت یقینی ہے۔ بہر حال  بی ایم سی انتخاب کی تاریخ کا اعلان اب تک نہیں کیا گیا ہے، لیکن اس پر نہ صرف ممبئی بلکہ ملک کی نظریں اس پر ٹکی ہوئی ہیں۔