مہاراشٹر: کیمیکل فیکٹری میں دھماکہ سے 3 افراد کی موت، 12 سنگین طور پر زخمی، زہریلی گیس رساؤ کا اندیشہ

مہاراشٹر کے پالگھر واقع تاراپور انڈسٹریل ایریا میں بدھ کو ایک کیمیکل کارخانہ میں آگ لگنے کے بعد ہوئے زوردار دھماکہ میں کم از کم تین لوگوں کی موت ہو گئی اور 12 دیگر افراد زخمی ہو گئے ہیں۔ پولیس کے ساتھ پہنچے فائر بریگیڈ اور دیگر بچاؤ ٹیم نے متاثرین کو کارخانہ سے نکال کر اسپتال پہنچایا۔

واقعہ شام تقریباً 4.15 بجے کا ہے۔ پالگھر پولیس کنٹرول روم کے ایک افسر نے کہا کہ تاراپور-بوئسر انڈسٹریل ایریا میں بھگیریا انڈسٹریز لمیٹڈ کے کیمیکل پلانٹ میں دھماکہ ہوا ہے۔ مقامی دمکل محکمہ، پولیس اور دیگر بچاؤ ٹیم، سینئر افسران کے ساتھ مدد فراہم کرنے کے لیے جائے حادثہ پر پہنچ گئے اور پھنسے ہوئے متاثرین کو نکالنے کا کام کیا۔ افسر نےبتایا کہ زخمیوں کو قریب کے اسپتال میں لے جایا گیا ہے اور واقعہ کی ابتدائی جانچ شروع کر دی گئی ہے۔ ان میں سے کچھ کی حالت بہت سنگین ہے، وہ بری طرح جھلس گئے ہیں۔

اندیشہ ظاہر کیا جا رہا ہے کہ ’بھاؤ-بیج‘ تہوار کے دن ہوئے دھماکہ کے بعد گیس رساؤ اور آگ لگنے کا واقعہ پیش آ سکتا ہے۔ دھماکہ کی وجہ بھی گیس رساؤ کے سبب ہو سکتا ہے جو کہ پلانٹ میں ایک بوائیلر کے کچھ مستقل رکھ رکھاؤ کام کے دوران ہوا ہوگا۔ حالانکہ تفصیلی رپورٹ ابھی سامنے نہیں آ سکی ہے اور جانچ کی جا رہی ہے۔

مقامی لوگوں کا کہنا ہے کہ انھوں نے کچھ زہریلی گیس رساؤ کے اندیشہ کے درمیان فیکٹری احاطہ سے آگ کی لپٹوں کے بعد ایک بڑا دھماکہ سنا، لیکن پولیس نے ابھی تک اس پر کوئی تبصرہ نہیں کیا ہے۔