کف سیرپ تنازعہ: جیتو پٹواری کا ایم پی کے وزیر صحت سے استعفے کا مطالبہ، بی جے پی حکومت کو بے حس قرار دیا

مدھیہ پردیش کے چھندواڑا میں ’کف سیرپ‘ پینے سے بچوں کی موت کے معاملہ پر ریاست کی بی جے پی حکومت پر اپوزیشن کانگریس نے جم کر حملہ بولا ہے۔ کانگریس کے ریاستی صدر جیتو پٹواری نے کہا کہ ’’حکومت انتہائی بے حس ہے۔ جب تامل ناڈو نے کہا کہ سیرپ میں زہریلے کیمیکل ہیں، جن سے بچوں کی موت ہوئی تو حکومت نے اسے کلین چٹ کیوں دی؟‘‘ ساتھ ہی انہوں نے وزیر صحت سے استعفیٰ کا بھی مطالبہ کیا ہے۔

کانگریس لیڈر جیتو پٹواری کے مطابق حکومت انتہائی بے حس ہے، جب تامل ناڈو نے کہا کہ کف سیرپ میں کچھ ایسے عناصر تھے جو موت کی وجہ بن رہے تھے تب بھی حکومت اسے کلین چٹ دیتی رہی۔ اگر حکومت میں اخلاقیات کی تھوڑی سی بھی رمق باقی ہے تو اسے فوری طور پر وزیر صحت سے استعفیٰ کا مطالبہ کرنا چاہیے۔ کیا حکومت کو قتل کا لائسنس دے دیا گیا ہے؟ میرا ماننا ہے کہ وزیر صحت کو فوری طور پر عہدہ سے برخاست کر دینا چاہیے۔

جیتو پٹواری کے علاوہ مدھیہ پردیش کے سابق وزیر اعلیٰ اور کانگریس کے سینئر لیڈر کمل ناتھ کا بھی ’کف سیرپ‘ معاملہ پر رد عمل سامنے آیا ہے۔ انہوں نے سوشل میڈیا پلیٹ فارم ’ایکس‘ پر لکھا کہ ’’چھندواڑا میں زہریلی کف سیرپ سے 11 معصوم بچوں کی موت ایک دل دہلا دینے والا اور المناک سانحہ ہے۔ کانگریس پارٹی مصیبت کی اس گھڑی میں ہر متاثرہ خاندان کے ساتھ کھڑی ہے۔‘‘

سابق وزیر اعلیٰ مزید کہتے ہیں کہ آج میری ریاستی کانگریس صدر جیتو پٹواری جی سے پورے معاملہ پر تفصیلی بات چیت ہوئی ہے۔ وہ کل چھندواڑا پہنچ کر سوگوار خاندانوں سے ملاقات کریں گے اور صورتحال کا جائزہ لیں گے۔ کمل ناتھ کا کہنا ہے کہ چھندواڑا ضلع کانگریس اکائی مسلسل متاثرہ خاندانوں کو انصاف دلانے کے لیے فعال ہے۔ ہم سب مل کر اس لڑائی کو انجام تک پہنچائیں گے۔ ساتھ ہی انہوں نے کہا کانگریس پارٹی چھندواڑا کے ان ننھے فرشتوں کو انصاف دلانے تک چین سے نہیں بیٹھے گی، جن کی زندگیاں حکومت کی لاپرواہی اور ڈرگ مافیا کی سازش کے سبب چلی گئیں۔