مدھیہ پردیش میں یوریا اور ڈی اے پی کی قلت، مٹر کی بُوائی متاثر، کسان شدید پریشان

بھوپال: مدھیہ پردیش کے کسان یوریا اور ڈی اے پی کی شدید قلت سے پریشان ہیں۔ کسان کئی دنوں سے کھاد کی تلاش میں ہیں لیکن دستیابی نہ ہونے کے سبب وہ بُوائی کے موسم میں مشکلات کا شکار ہیں۔ مٹر کی بُوائی کا وقت قریب ہے لیکن کھاد نہ ملنے کے باعث کسانوں کی پریشانی بڑھتی جا رہی ہے۔ رپورٹ کے مطابق، شہپورہ، چرگواں، بیل کھیڑا، نیم کھیڑا سمیت متعدد علاقوں میں کسان مسائل سے دوچار ہیں اور سخت ناراض ہیں۔

کھاد کی تقسیم کے لیے جبل پور سے تقریباً 40 کلومیٹر دور شہپورا زرعی پیداوار منڈی اور ڈبل لاک سنٹر پر علی الصبح سے ہی کسانوں کی لمبی قطاریں لگ جاتی ہیں۔ بھوکے پیاسے کسان کئی گھنٹوں تک انتظار کرتے ہیں لیکن وقت پر کھاد دستیاب نہیں ہوتی۔ انتظامیہ کو صورتحال کو قابو میں رکھنے کے لیے پولیس بھی تعینات کرنا پڑی۔

کسان جتیندر سنگھ نے اے آئی این ایس کو بتایا کہ وہ رات 3 بجے سے قطار میں ہیں اور انہیں 180 نمبر کا ٹوکن ملا ہے مگر صبح سے بغیر کچھ کھائے پیئے وہ انتظار کر رہے ہیں تاہم کھاد نہیں ملی۔ ایک اور کسان نے کہا کہ وہ صبح 5 بجے سے ڈی اے پی کھاد لینے کے لیے لائن میں ہیں لیکن ابھی تک کھاد دستیاب نہیں ہوئی۔ یوریا کا اسٹاک گودام میں موجود ہے، پھر بھی تقسیم نہیں ہو رہی۔

ایک اور کسان نے بتایا کہ 22 اگست کو ان کا ٹوکن کٹا تھا لیکن ایک ماہ گزرنے کے باوجود وہ کھاد کے حصول کے لیے پریشان ہیں۔ بار بار لائن میں لگنے کے باوجود انہیں کھاد نہیں مل پا رہی۔

اس بارے میں زرعی افسر ایس کے پرتیتی نے بتایا کہ کھاد ٹوکن کے حساب سے فراہم کی جا رہی ہے اور پہلے سے درج شدہ نمبرز والے کسانوں کو ترجیح دی جا رہی ہے۔ انہوں نے کہا کہ یوریا کی نئی ترسیل پیر یا منگل تک آنے کی توقع ہے اور جیسے ہی کھاد دستیاب ہوگی، کسانوں کو تقسیم کر دی جائے گی۔

کسانوں کا کہنا ہے کہ انہوں نے پہلے بھی کئی بار کھاد کی فراہمی کی درخواست کی، مگر مسئلہ حل نہیں ہوا۔ انتظامیہ روزانہ کافی اسٹاک ہونے کا دعویٰ کرتی ہے، لیکن زمینی حقائق میں کسان کئی گھنٹے انتظار کے بعد بھی خالی ہاتھ واپس لوٹنے پر مجبور ہیں۔

یہ صورتحال مٹر کی بُوائی کے موسم میں کسانوں کے لیے سنگین مسائل پیدا کر رہی ہے اور زرعی پیداوار پر منفی اثر ڈال سکتی ہے، اگر فوری اقدامات نہ کیے گئے تو مستقبل میں فصل کی پیداوار متاثر ہونے کا خدشہ ہے۔