کشمیر میں برفباری کے درمیان لینڈ سلائیڈنگ کا خطرہ، وارننگ جاری

جموں و کشمیر میں گاندربل پولیس نے ایڈوائزری جاری کر کے عام لوگوں، سیاحوں اور ٹرانسپورٹروں سے برفانی تودے سے متاثرہ علاقوں میں سفر کرنے یا رہنے سے گریز کرنے کی اپیل کی ہے۔ یہ ایڈوائزری منگل کی رات تقریباً 10:15 بجے سونہ مرگ کے نیو ٹرک یارڈ میں برفانی تودہ گرنے کے پیش نظر جاری کی گئی۔ افسران کے مطابق برفانی تودے کا اثر کم تھا اور کسی جانی یا مالی نقصان کی کوئی اطلاع نہیں ہے۔ ایس ڈی آر ایف کے ساتھ پولیس کی ایک ٹیم فوری طور پر علاقے میں پہنچی اور صورتحال کا جائزہ لیا۔

افسر نے بتایا کہ متعلقہ ایجنسیاں صورتحال پر گہری نظر رکھے ہوئے ہیں اور علاقے میں لوگوں کی حفاظت کو یقینی بنانے کے لیے احتیاطی اقدامات کئے جا رہے ہیں۔ اس کے علاوہ ڈیزاسٹر مینجمنٹ ٹیموں کو بھی الرٹ کر دیا گیا ہے۔ پولیس ایڈوائزری میں عام لوگوں، سیاحوں اور ٹرانسپورٹرز پر زور دیا گیا ہے کہ وہ برفانی تودے کے شکار علاقوں میں سفر کرنے یا رہنے سے گریز کریں۔ اس میں کہا گیا کہ برفانی تودے گرنے کا امکان بہت زیادہ ہے اور خطرناک علاقوں میں غیر ضروری سفر سے سنگین خطرات لاحق ہو سکتے ہیں۔

لوگوں سے سرکاری ایڈوائزری پر عمل کرنے کی اپیل کے ساتھ کہا گیا ہے کہ مقامی افسران کے ساتھ تعاون کریں اور سونہ مرگ اور آس پاس کے علاقوں سے سفر کرتے وقت حفاظت کو ترجیح دیں۔ اس دوران یہ بھی کہا گیا کہ گاندربل پولیس لوگوں کی حفاظت اور بہبود کے لیے پرعزم ہے اور ہر ایک سے چوکس رہنے اور ذمہ داری سے کام کرنے کی تاکید کرتی ہے۔

واضح رہے کہ وادی کشمیر میں گزشتہ چند دنوں سے شدید برف باری ہو رہی ہے جس کی وجہ سے بڑی تعداد میں سیاح بھی یہاں کا رخ کر رہے ہیں۔ تاہم حد سے زیادہ برف باری اب عام زندگی کو متاثر کر رہی ہے۔ اگرچہ ابھی تک کسی بڑے نقصان کی اطلاع نہیں ہے، تاہم پولیس انتظامیہ کو احتیاطی تدابیر کے طور پر الرٹ کر دیا گیا ہے۔