’می ٹو‘ پر بی جے پی لیڈر کا متنازعہ بیان ’خواتین ترقی کےلئےشارٹ کٹ اپناتی ہیں‘

’می ٹو‘ مہم نے جہاں ایک طرف پورے ملک میں ہنگامہ برپا کر رکھا ہے اور بالی ووڈ، میڈیا اور سیاست سے تعلق رکھنے والے بڑے نام اس میں پھنستے ہوئے نظر آ رہے ہیں، وہیں بی جے پی کی ایک خاتون لیڈر نے اس سلسلے میں متنازعہ بیان دیا ہے۔ مدھیہ پردیش سے تعلق رکھنے والی بی جے پی لیڈر اوشا ٹھاکر کا کہنا ہے کہ کئی بار خواتین ترقی حاصل کرنے کے لیے شارٹ کٹ راستہ اختیار کرتی ہیں اور پریشانی میں پھنس جاتی ہیں۔

دراصل بی جےپی کی مدھیہ پردیش یونٹ کی نائب صدر اور اندور کی رکن اسمبلی اوشا ٹھاکر نے می ٹو کیمپین سے متعلق پوچھے گئے ایک سوال کے جواب میں یہ متنازعہ بیان دیا اور میڈیا کے سامنے واضح لفظوں میں کہا کہ ’’خواتین ترقی پانے کےلئے شارٹ کٹ راستہ اختیارکرتی ہیں۔‘‘ اوشا ٹھاکر نے یہ بیان 14 اکتوبر کو اندور میں منعقد ایک ذاتی پروگرام میں دیا۔

پروگرام کے دوران اوشا ٹھاکر نامہ نگاروں سے وزیر مملکت برائے خارجہ ایم جے اکبر پر عائد جنسی استحصال کے الزامات کے سوال پر رد عمل ظاہر کر رہی تھیں۔ اس دوران انھوں نے کہا کہ ’’خواتین ذاتی مفاد کے لئے اخلاقی اقدارسے سمجھوتہ کرتی ہیں،اس لئے پریشانیوں میں پھنستی ہیں۔کئی بار خواتین ترقی پانے کےلئے شارٹ کٹ کا راستہ اپنا لیتی ہیں۔‘‘انہوں نے مزید کہاکہ اس طرح زندگی کے اصولوں سے سمجھوتہ کرکے حاصل کی گئی کامیابی بے کار ہے۔

(یو این آئی ان پٹ کے ساتھ)