اتر پردیش ریاستی کانگریس دفتر میں افطار پارٹی کا اہتمام، دیکھنے کو ملی ہندوستان کی اصل تصویر 

نئی دہلی/لکھنؤ: اتر پردیش کانگریس کمیٹی کے دفتر نہرو بھون لکھنؤ میں آج افطار پروگرام کا اہتمام کیا گیا، جس میں ہندوستان کی حقیقی تصویر دیکھنے کو ملی۔ ریاست بھر سے روزہ داروں، شہر کے معزز اشخاص اور کانگریس کارکنان نے بڑی تعداد میں شرکت کی۔ افطار کے دوران سب نے مل کر ملک کی خوشحالی، امن اور ترقی کے لیے دعا کی۔

روزہ و افطار پروگرام میں کئی اہم شخصیات نے شرکت کی جن میں عیش باغ عیدگاہ کے امام مولانا خالد رشید فرنگی محلی، معروف شیعہ مذہبی رہنما مولانا یعسوب عباس، ٹیلے والی مسجد کے امام مولانا فضل منان واعظی، مولانا سفیان نظامی، مولانا واصف واعظی، سینئر ایڈووکیٹ اور بار کونسل کے لیڈر سید فضل الرحمان فیضی اور سابق وزیر موید احمد و دیگر شامل ہیں۔

روزہ افطار پروگرام میں بطور مہمان خصوصی قومی جنرل سکریٹری، اتر پردیش کے انچارج اویناش پانڈے، ریاستی کانگریس کے صدر اجے رائے، آل انڈیا کانگریس کمیٹی اقلیتی شعبہ کے چیئرمین اور راجیہ سبھا رکن عمران پرتاپ گڑھی، اتر پردیش کانگریس قانون ساز پارٹی کی لیڈر آرادھنا مشرا مونا، نیشنل سکریٹری شریک انچارج دھیرج گجر، توقیر عالم، شاہنواز عالم نے شرکت کی۔ اس کے ساتھ ہی راجیہ سبھا میں اپوزیشن کے ڈپٹی لیڈر پرمود تیواری، کانگریس کے سینئر لیڈر اور سابق مرکزی وزیر سلمان خورشید، راکیش راٹھور، رکن پارلیمنٹ عمران مسعود، تنوج پونیا نے افطار پروگرام میں شرکت کی۔

اس موقع پر آل انڈیا کانگریس کمیٹی کے جنرل سکریٹری اور اتر پردیش کے انچارج اویناش پانڈے نے کہا کہ رمضان کا مقدس مہینہ ہمیں بھائی چارے، محبت، قربانی اور انسانیت کا پیغام دیتا ہے۔ یہ مہینہ معاشرے میں اتحاد، ہم آہنگی اور باہمی اعتماد کو مضبوط کرنے کا موقع بھی فراہم کرتا ہے۔ کانگریس پارٹی نے ہمیشہ تمام مذاہب کا احترام کیا ہے اور ملک میں گنگا جمنی تہذیب و سماجی ہم آہنگی کو برقرار رکھنے کے لیے وقتاً فوقتاً ہولی ملن اور روزہ افطار جیسے پروگراموں کے ذریعے انسانیت کا پیغام دیا ہے۔

اپنے خطاب میں اتر پردیش کانگریس کمیٹی کے صدر اجے رائے نے کہا کہ رمضان کا مقدس مہینہ عبادت اور روحانی تزکیہ کا موقع ہے، جس میں ہم اللہ کی عبادت اور قرآن کی تلاوت کے ذریعے اپنے طرز عمل کو صاف کرتے ہیں۔تاہم ہم اپنی استطاعت کے مطابق غریبوں اور ضرورت مندوں کی مدد کرکےثواب کمانے کا شرف حاصل کرتے ہیں۔ راجیہ سبھا ممبر پارلیمنٹ پرمود تیواری نے کہا کہ کانگریس پارٹی کی قربانی اور جامعیت کی تاریخ ہے۔ انہوں نے مزید کہا کہ سیاسی فائدے کے لیے معاشرے کو تقسیم کرنا آسان ہے لیکن آپسی بھائی چارہ قائم رکھنا ہی حقیقی حب الوطنی ہے۔

آرادھنا مشرا ’مونا‘ نے اپنی بات رکھتے ہوئے کہا کہ ہمارا کلچر متحد ہونے کی بات کرتا ہے، تقسیم کرنے کی نہیں۔ ہم ایک ایسا معاشرہ بنانا چاہتے ہیں جہاں ہر فرد محفوظ اور عزت محسوس کرے۔ راجیہ سبھا رکن اور معروف شاعر عمران پرتاپ گڑھی نے اس موقع پر کہا کہ افطار کی یہ شام نفرت کے اندھیروں کے خلاف محبت کی روشنی ہے۔ کوئی بھی طاقت اتر پردیش کی گنگا جمنی تہذیب کو ختم نہیں کر سکتی۔

کانگریس کے سینئر لیڈر اور رکن پارلیمنٹ عمران مسعود نے بھی جمع لوگوں سے خطاب کیا۔ انھوں نے کہا کہ عوام اب نفرت کی سیاست سے تنگ آچکے ہیں۔ ہمیں اپنے حقوق کے ساتھ ساتھ ملک کے مشترکہ ورثے اور بھائی چارے کا بھی تحفظ کرنا چاہیے۔ رکن پارلیمنٹ تنوج پونیا نے کہا کہ نوجوانوں کی ذمہ داری ہے کہ وہ اپنے بزرگوں سے وراثت میں ملی اس گنگا جمنی تہذیب کو آگے بڑھائیں اور ایک ایسے معاشرے کی تعمیر کریں جہاں انسانیت سب سے مقدم ہو۔