کسان تحریک: ہریانہ کے تین اضلاع میں انٹرنیٹ خدمات پر پابندی میں توسیع

چنڈی گڑھ: ہریانہ سرکار نے سونی پت ، پلوال اور جھجر اضلاع میں وائس کال کوچھوڑ کر انٹرنیٹ اور ایس ایم ایس خدمات پر پابندی کی معیاد میں 29 جنوری شام 5 بجے تک توسیع کردی ہے۔

ایک سرکاری ترجمان نے یہ معلومات دیتے ہوئے بتایا کہ اس پابندی سے بینکنگ اور موبائل ریچارج سروسزمبرا رہیں گی ۔ سرکار نے یہ احکامات علاقے میں امن وامان میں کسی بھی قسم کے خلل کو روکنے کے لئے جاری کیے ہیں ۔ سرکار نے تمام ٹیلی کام آپریٹروں کو ان احکامات پر عمل کرنے کو کہا ہے۔

ترجمان کے مطابق ریاستی سرکار نے ایس ایم ایس ، واٹس ایپ ، فیس بک ٹویٹر وغیرہ سوشل میڈیا کے مختلف ذرائع سے غلط تشہیراورافواہوں کو روکنے کے لئے انٹرنیٹ خدمات کو بند رکھنے کی معیاد کو اگلے 24 گھنٹوں کے لئے بڑھانے کا فیصلہ کیا ہے۔

اس دوران گزشتہ 26 جنوری کے دہلی کوچ کے بعد بھی بدووال ٹول پلازا پر کسانوں کا دھرنا جاری ہے۔ حالانکہ جمعرات کو پولیس انتظامیہ نے کسانوں سے دھرنا ختم کرکے ٹول پلازا شروع کرنے کی اپیل کی لیکن انہوں نے اسے مسترد کردیا۔ ایسے میں جمعرات کو بھی بدوووال ٹول پلازا پر گاڑیوں کا مفت نکلنا جاری ہے۔

کسانوں کے دھرنا ختم کرنے سے انکار کرنے پر ضلع انتظامیہ نے کسانوں کے وفد سے میٹنگ کی۔ میٹنگ میں ایس ڈی ایم سمت سہاگ،پولیس ڈپٹی سپرنٹنڈنٹ طاہر حسین،صدر تھانہ انچارج سوم ویر ڈھاکہ ،شہری انچارج مہیندر سنگھ اور نائب تحصیل دار اور دیگر افسر موجود رہے۔میٹنگ میں کسانوں کی جانب سے بلویر سنگھ، رندھیر مور اور پرتھوی سمیت دیگرنے حصہ لیا۔

سہاگ نے کسان وفد سے ٹول پلازا سے دھرنا ختم کر کے اس کےلئے متبادل مقام کی پیش کش کی۔انہوں نے کسان رہنماؤں سے اپیل کی ہے کہ اگر کوئی شرارتی عناصر پر ماحول خراب کرتا ہے تو فوراً انتظامیہ کو اطلاع دیں تاکہ کسی قسم کا بد امنی نہ ہو اور مکمل کارروائی کی جا سکے۔

میٹنگ کے بعد کسانوں نے کہا کہ جب تک اعلی کمیٹی کا فیصلہ ہے کہ ٹول پلازا پر دھرنا جاری رہے گا اور کمیٹی کے کہنے پر ہی وہ اسے ختم کریں گے۔ کسان رہنماؤں نے اپنی دلیل کی حمایت میں ہریانہ مین دیگر مقامات اور پنجاب میں بھی ٹول آزاد ہونے اور وہاں پر دھرنا جاری رہنے کا ذکر کیا اور کہاکہ وہ اپنے مطالبات ماننے کے بعد ہی گھر لوٹیں گے۔