حج 2024: دہلی اسٹیٹ حج کمیٹی میں بغیر محرم حج پر جانے والی خواتین کے لیے خصوصی کیمپ منعقد

نئی دہلی: مقدس سفر حج 2024 پر جانے والے عازمین کو دہلی اسٹیٹ حج کمیٹی کی طرف سے علاقہ وار دی جانے والی حج سے متعلق تربیت کے سلسلے میں، دہلی سے بغیر محرم حج کے مقدس سفر پر جانے والی 34 بغیر محرم خواتین کو تربیت فراہم کرنے کے لیے 29 اپریل 2024 کو دہلی اسٹیٹ حج کمیٹی کے دفتر حج منزل میں ایک خصوصی پروگرام کا انعقاد کیا گیا۔ اس خصوصی پروگرام کا اہتمام دہلی اسٹیٹ حج کمیٹی کی چیئرپرسن کوثر جہاں کی خصوصی پہل پر کیا گیا۔

اس موقع پر چیئرپرسن کوثر جہاں نے بغیر محرم حج پر جانے والی خواتین سے خصوصی ملاقات کی اور اپنے خطاب میں انہیں مقدس حج کی مبارکباد دی اور بتایا کہ دہلی اسٹیٹ حج کمیٹی انہیں ہر طرح کی سہولیات فراہم کرنے کے لیے ہر ممکن کوشش کر رہی ہے اور کسی کو کسی قسم کی پریشانی کا سامنا نہیں کرنے دیا جائے گا۔ انہوں نے یہ بھی یقین دلایا کہ تمام بغیر محرم خواتین کو ایک ہی فلائٹ میں مکمل سیکورٹی کے ساتھ مدینہ شریف پہنچایا جائے گا اور وہ خود بھی ہر قسم کے انتظامات کو یقینی بنانے کے لیے ایئرپورٹ پر موجود ہوں گی۔

واضح رہے کہ اس سال دہلی امبارکیشن پوائنٹ سے محرم کے بغیر حج پر جانے والی خواتین کی کل تعداد 69 ہے جبکہ پورے ہندوستان سے محرم کے بغیر حج پر جانے والی خواتین کی کل تعداد تقریباً 4300 ہے۔