کیرالہ: 20 ہزار بطخوں کی موت سے کسانوں میں خوف، انتظامیہ میں ہلچل

کورونا وبا کے اس دور میں ہندوستان کے لیے یہ راحت کی خبر ہے کہ گزشتہ کچھ دنوں سے 20 ہزار سے کم کورونا انفیکشن کے معاملے سامنے آئے ہیں، لیکن اس درمیان کیرالہ میں بطخوں کی پراسرار موت نے لوگوں میں خوف کا عالم پیدا کر دیا ہے۔ کیرالہ اوپری کُٹّناد میں تقریباً 20 ہزار بطخوں کی موت ہو گئی ہے جس نے لوگوں کو دہشت میں ڈال دیا ہے۔ خصوصی طور پر کسانوں میں خوف کا ماحول دیکھنے کو مل رہا ہے۔

بتایا جا رہا ہے کہ ایدتھوا تھالاواد علاقہ میں بطخوں کے مرنے کا سلسلہ گزشتہ کئی دنوں سے جاری ہے۔ کسانوں نے اپنی سطح پر ان بطخوں کو بچانے کے لیے کئی تراکیب کا استعمال کیا، لیکن انھیں کوئی خاص کامیابی حاصل نہیں ہوئی۔ بطخوں کے پراسرار طریقے سے ہلاک ہونے پر مقامی انتظامیہ میں بھی ہلچل دیکھنے کو مل رہی ہے۔ انتظامیہ بطخوں کی موت پر گہرائی سے نظر رکھ رہی ہے تاکہ اس کے اسباب کے بارے میں پتہ لگایا جا سکے۔

میڈیا ذرائع سے موصول ہو رہی خبروں کے مطابق بطخ پالنے والے کسان پریشان ہیں کہ کہیں یہ ہلاکتیں کسی بیماری کی وجہ سے تو نہیں ہو رہی ہیں۔ حالانکہ علاقے کے مائیکرووائیرولوجی ڈپارٹمنٹ کا کہنا ہے کہ بطخوں کی موت سے برڈ فلو کا کوئی خطرہ نہیں ہے۔ ڈپارٹمنٹ بڑی تعداد میں بطخوں کی اموات کے اسباب کا پتہ کرنے کی کوشش کر رہی ہے۔ کیرالہ حکومت نے مقامی انتظامیہ کو حکم دیا ہے کہ وہ اس پورے واقعہ پر نظر رکھے اور کسانوں کی ہر ممکن مدد کرے۔

واضح رہے کہ ستمبر 2018 میں بھی اوپری کٹّناد علاقے میں بیکٹیریا انفیکشن کی وجہ سے بڑی تعداد میں بطخوں کی موت ہو گئی تھی۔ اس کے بعد بطخوں کی اموات کی خبریں ان علاقوں سے بھی موصول ہوئی تھیں جو سیلاب سے متاثر ہوئے تھے۔ جہاں تک بطخوں کی اموات سے جڑے تازہ معاملوں کی بات ہے، ایسا بھی بتایا جاتا ہے کہ جن بطخوں کی موت ہوئی، ان کی پرورش آلودہ پانی میں ہوئی ہے۔