کورونا کے اس قہر کے بیچ بھی کیجریوال سیاست سے باز نہیں آئے!

نئی دہلی: کورونا کی وجہ سے پیدا ہوئے طبی بحران پر مشورہ کرنے کے لئے وزیر اعظم نے ملک کی ان دس ریاستوں کے وزرائے اعلی سے ڈیجیٹل میٹنگ کی جن ریاستوں میں کورونا کا قہر جاری ہے۔ ان دس وزرائے اعلی میں دہلی کے اروند کیجریوال بھی شامل تھے لیکن کیجریوال نے ایک ایسی حرکت کر دی جس کے بعد سیاسی حلقوں میں ان کی تنقید ہو رہی ہے۔ واضح رہے انہوں نے اس میٹنگ میں جو بولا اس کا لائیو ٹیلی کاسٹ کر دیا۔ عام طور پر ایسی میٹنگوں کو ’کانفیڈینشل‘ کے زمرے میں مانا جاتا ہے۔

نیوز 18 پر شائع خبر کے مطابق سرکاری ذرائع نے کہا کہ کیجریوال نے اس پلیٹ فارم کو دہلی میں صورتحال کو بہتر بنانے کے لئے استعمال کرنے کے بجائے سیاست کرنے کے لئے استعمال کیا ہے۔ اروند کیجریوال نے اس میٹنگ میں مطالبہ کیا تھا کہ آکسیجن کو جہاز اور ٹرین کے ذریعہ منتقل کیا جائے جس پر ذرائع نے کہا کہ دہلی کے وزیر اعلی کو یہ معلوم ہونا چاہئے کہ انڈین ایئر فورس کی مدد سے پہلے ہی آکسیجن کو ایک جگہ سے دوسری جگہ منتقل کیا جا رہا ہے اور ریاستوں کی درخواست پر ٹرینیں اس کام میں پہلے لگی ہوئی ہیں اور دہلی حکومت کی جانب سے ایسی کوئی درخواست موصول نہیں ہوئی ہے۔

سرکاری ذرائع کا یہ بھی کہنا ہے کہ کیجریوال ٹیکے کے تعلق سے بھی ریاستوں اور مرکز کے درمیان غلط فہمی پیدا کرنے کی کوشش کر رہے ہیں۔ مرکز نے کیجریوال پر سیاست کرنے کا الزام لگایا ہے اور کہا ہے کہ وہ اپنی ناکامی کا ٹھیکرا مرکز کے اوپر پھوڑنے کی کوشش کر رہے ہیں۔

اس سارے معاملہ پر دہلی حکومت نے وضاحت کی ہے کہ ان کو ایسی کوئی ہدایت نہیں تھی کہ اس میٹنگ کو کانفیڈینشل رکھنا ہے۔ انہوں نے کہا کہ ماضی میں ایسا کئی مرتبہ ہوا ہے جب عوامی اہمیت کے حامل مدوں پر ہونے والی میٹنگوں، جن کو کانفیڈینشل رکھنے کے لئے نہیں کہا گیا، ان کو لائیو کیا گیا ہے۔ دہلی حکومت نے معافی مانگتے ہوئے کہا ہے کہ اگر اس سے کوئی پریشانی پیدا ہوئی ہے تو وہ معازرت خواہ ہیں۔

نیوز 18 کے مطابق اب ایک ویڈیو سامنے آیا ہے جس میں وزیر اعظم نے کیجریوال کا نام لئے بغیر کہا ہےکہ میٹنگ کو کانفیڈنیشل رکھنے کا چلن رہا ہے اور یہ کسی بھی وزیر اعلی کے لئے مناسب نہیں ہے کہ وہ میٹنگ کے بیچ میں لائیو ٹیلی کاسٹ کر دے۔ کہا جا رہا ہے کہ کیجریوال اس کے لئےمعافی مانگ رہے ہیں۔

واضح رہے کیجریوال حکومت اپنی طبی خدمات کے لئے خوب تعریف کرتی رہی ہے لیکن دہلی والوں نے کورونا کے دوران دیکھا ہے کہ دہلی میں طبی سہولیات کا معیار کس قسم کا ہے۔ دہلی کے وزیر اعلی آکسیجن کے لئے مرکز کو مورد الزام ٹھہرا رہے ہیں لیکن حقیقت یہ ہے کہ دہلی والوں کا دہلی کی حکومت کے اوپر سے اعتماد ختم ہو گیا ہے۔