ہبلی فسادات معاملہ میں کرناٹک ہائی کورٹ سے 106 افراد کو ضمانت

بنگلورو: کرناٹک ہائی کورٹ نے جمعہ کو ہبلی فسادات معاملہ میں 106 افراد کی درخواست ضمانت منظور کر لی۔ جسٹس سرینواس ہریش کمار اور جسٹس ونکٹیش نائک کی سربراہی والی ڈویژن بنچ نے یہ فیصلہ سنایا۔ اس سے قبل سپریم کورٹ نے بھی 35 افراد کی ضمانتیں منظور کی تھیں جب کہ کیس کے سلسلے میں حراست میں لیے گئے نابالغ لڑکوں کو بھی ضمانت دی جا چکی ہے۔

دریں اثنا، انجمن اسلام ہبلی کے صدر، یوسف سونور نے گرفتار شدگان کی ضمانت پر ان کے رشتہ داروں اور خاندان کے افراد کو مبارکباد پیش کی۔ انہوں نے کہا، ’’ہم انجمن اسلام ہبلی کی جانب سے عدالت میں ضمانت کی کوششیں کیں جو کامیاب رہیں اور لوگوں کو رہائی ملی۔ ہم تمام دعائیں قبول ہوئیں۔‘‘

خیال رہے کہ 16 اپریل 2022 کو کرناٹک کے ہبلی شہر میں ایک مذہبی مقام پر پرچم کی فوٹو شاپ تصویر وائرل ہونے کے بعد تشدد پھوٹ پڑا تھا۔ پولیس نے تشدد کے سلسلے میں 152 لوگوں کو گرفتار کیا تھا اور اس معاملے میں 12 مقدمات درج کیے تھے۔ مشتعل ہجوم نے لوگوں اور تھانے پر حملہ کیا تھا، پولیس کی 10 گاڑیوں کو نقصان پہنچایا اور ایک پولیس انسپکٹر اور 6 پولیس اہلکاروں پر حملہ کیا گیا تھا۔