جموں میں سیلاب اور لینڈ سلائیڈنگ کے سبب ہلاکتوں کی تعداد 45 تک پہنچی، ہزاروں محفوظ مقامات پر منتقل

جموں: جموں و کشمیر کے جموں اور سانبہ اضلاع میں ریکارڈ بارش اور شدید سیلاب کے بعد ریسکیو اور ریلیف آپریشن تیز ترین رفتار سے جاری ہیں۔ گزشتہ روز مختلف مقامات سے مزید چار لاشیں برآمد ہوئی ہیں، جس کے بعد مجموعی ہلاکتیں 45 تک پہنچ گئی ہیں۔

ذرائع کے مطابق، گزشتہ دو روز میں ہونے والی غیر معمولی بارش کے باعث شدید طغیانی اور لینڈ سلائیڈنگ ہوئی، جس نے علاقے میں بڑے پیمانے پر تباہی مچا دی۔ خاص طور پر مشہور ماتا ویشنو دیوی یاترا کی روٹ پر لینڈ سلائیڈنگ سے 34 افراد ہلاک ہوئے، جن میں 14 خواتین شامل ہیں۔ اب تک 24 لاشوں کی شناخت بھی کر لی گئی ہے۔

سرکاری ذرائع کے مطابق، جموں میں چار مزید لاشیں برآمد ہوئی ہیں۔ ان میں ایک لاش ناگروٹہ میں دریائے توی سے، ایک مرہ علاقے کے نالے سے، ایک آر ایس پورہ کے کرکھولا علاقے میں سرحدی باڑ کے قریب اور ایک سانبہ کے بری برہمنہ کے ٹیلی بستی علاقے سے نکالی گئی۔

ضلعی انتظامیہ نے بتایا کہ اب تک بارہ ہزار سے زائد افراد کو محفوظ مقامات پر منتقل کیا جا چکا ہے جبکہ تقریباً 50 دیہات کی سڑک رابطے کی لائنیں منقطع ہیں۔ درجنوں سڑکیں اور پل لینڈ سلائیڈنگ کی وجہ سے بند ہیں۔ بھاری مشینری کے ذریعے ملبہ اور کیچڑ ہٹانے کا کام جاری ہے تاکہ متاثرہ علاقوں تک امدادی سامان پہنچایا جا سکے۔

محکمہ فلڈ کنٹرول کے ایک عہدیدار نے بتایا کہ بڑے دریاؤں جن میں توی، چناب، بسنتَر، راوی اور اُجھ شامل ہیں، میں پانی کی سطح اب کم ہونا شروع ہوگئی ہے، تاہم نشیبی علاقوں میں رہائشیوں کو احتیاطی تدابیر اختیار کرنے کی ہدایت کی گئی ہے۔

ادھر ریلوے حکام نے بتایا کہ بارش اور لینڈ سلائیڈنگ کے سبب بدھ کو 58 ٹرینیں منسوخ کی گئی تھیں، تاہم جمعرات کو دو ہزار سے زائد پھنسے ہوئے مسافروں کو نکالنے کے لیے خصوصی ٹرینیں چلائی گئیں۔

واضح رہے کہ اس ماہ کے اوائل میں 14 اگست کو کشتواڑ کے چسوتی علاقے میں بادل پھٹنے سے شدید تباہی ہوئی تھی، جس میں 65 افراد، زیادہ تر یاتری، لقمہ اجل بن گئے تھے۔ اس واقعے میں سو سے زائد افراد زخمی ہوئے اور 32 افراد اب بھی لاپتہ ہیں۔

حکام نے کہا کہ بارشوں سے ہونے والے نقصانات کا تخمینہ لگانے کا عمل جاری ہے اور تباہ شدہ انفراسٹرکچر، رہائشی مکانات اور تجارتی املاک کی بحالی کے لیے ہنگامی منصوبہ بندی کی جا رہی ہے۔ متاثرہ علاقوں میں امدادی کارروائیاں جاری ہیں اور حکام مقامی لوگوں کی حفاظت اور بنیادی ضروریات کی فراہمی کو یقینی بنانے کے لیے مسلسل کوشاں ہیں۔