جموں کشمیر اکیڈمی آف یونیفائڈ مارشل آرٹس کے زیر اہتمام سرمائی کیمپ اختتام پذیر

پہلگام: وادی کشمیر کے شہرہ آفاق سیاحتی مقام پہلگام میں جموں کشمیر اکیڈمی آف یونیفائڈ مارشل آرٹس کے زیر اہتمام منعقدہ دوسرے سرمائی کیمپ میں مختلف عمر کے زمروں کے کم وبیش 120 کھلاڑیوں جن میں لڑکیاں بھی شامل تھیں، نے حصہ لیا۔

جموں کشمیر اکیڈمی آف یونیفائڈ مارشل آرٹس نے 'ڈرگس آوٹ، سپورٹس ان مہم' پروگرام کے تحت پہلگام میں چار روزہ سرامئی کیمپ کا اہتمام کیا تھا۔ اس چار روزہ سرمائی کیمپ، جس میں شرکت کرنے والے کھلاڑیوں کو ہفتہ کے روز گندن اسٹیڈیم سے جھنڈی دکھا کر روانہ کیا گیا تھا، منگل کے روز اختتام پذیر ہوا۔

جے کے اے یو ایم اے کی طرف سے شروع کئے گئے مارشل آرٹس کے ذریعے صحت مند زندگی کو فروغ دینے کی مہم کی ستائش کرتے ہوئے گورنر ستیہ پال ملک کے مشیر کے وجے کمار نے کہا کہ نوجوانوں کی انرجی کو مثبت سمت دینے کے لئے سپورٹس کلچر کو فروغ دینے کی ضرورت ہے۔

انہوں نے کہا کہ نوجوانوں کو کیمپنگ کلچر سے آشنا نہیں کیا گیا ہے اور ایسے پروگراموں کی وساطت سے نوجوانوں کو دوسرے حصوں کے کھلاڑیوں کے ساتھ ملنے جلنے کا موقعہ فراہم ہوگا۔ انہوں نے کہا کہ جموں کشمیر اکیڈمی آف یونیفائڈ مارشل آرٹس کو سپورٹس سرگرمیاں بشمول نیشنل ٹونامنٹس منعقد کرانے میں ہر ممکن مدد فراہم کیا جائے گا۔

سرمائی کیمپ کے مہتممین نے کہا کہ اس کیمپ کا اہتمام سال 2019 کے دوران ہونے والے بین الاقوامی، قومی، ریاستی اور ضلع سطح پر ہونے والے سپورٹس پرگراموں کے لئے کھلاڑیوں کو تیار کرنے کےلئے کیا گیا۔ اس موقعہ پر جموں کشمیر سپورٹس کونسل کے سیکریٹری ڈاکٹر نسیم جاوید چودھری نے بھی اکیڈمی کی کاوشوں کی ستائش کی۔ قابل ذکر ہے کہ سال گذشتہ کے ماہ فروری میں اکیڈمی کی طرف سے منعقدہ سرمائی کیمپ میں قریب دو سو کھلاڑیوں نے شرکت کی تھی۔