دیوالی سے قبل ’آئی آر سی ٹی سی‘ کی ویب سائٹ میں خرابی، ٹکٹوں کی بُکنگ میں رکاوٹ سے مسافر پریشان

دیوالی اور چھٹھ کے قریب آتے ہی جب لاکھوں لوگ گھروں کو لوٹنے کے لیے ٹرین کے ٹکٹ بُک کرنے لگے تو جمعرات کی صبح ریلوے کی آن لائن ٹکٹنگ سروس ’آئی آر سی ٹی سی‘ نے اچانک کام کرنا بند کر دیا۔ ویب سائٹ اور موبائل ایپ دونوں ہی صارفین کے لیے کافی دیر کے لیے غیر فعال ہو گئیں، جس کے نتیجے میں ملک بھر کے ریلوے مسافر سخت پریشانی میں مبتلا ہو گئے۔

آئی آر سی ٹی سی کی ویب سائٹ پر ظاہر ہونے والے نوٹیفکیشن میں لکھا تھا، ’’اگلے ایک گھنٹے تک تمام سائٹس پر بُکنگ اور کینسلیشن دستیاب نہیں ہوگی۔ پیش آنے والی تکلیف کے لیے ہمیں افسوس ہے۔‘‘

ساتھ ہی صارفین کو مشورہ دیا گیا کہ وہ کینسلیشن یا ٹی ڈی آر کے لیے ہیلپ لائن نمبرز 08044647999 اور 08035734999 پر رابطہ کریں یا ای میل کے ذریعے etickets@rcte.co.in پر اطلاع دیں۔

یہ خلل صبح تقریباً 10:40 بجے اس وقت پیدا ہوئی جب تتکال بُکنگ کا وقت شروع ہونے ہی والا تھا۔ عام طور پر اے سی کلاس کے لیے تتکال بُکنگ صبح 10 بجے اور سلپر کلاس کے لیے 11 بجے کھلتی ہے لیکن آج بکنگ کے آغاز سے کچھ دیر پہلے ہی ویب سائٹ اور ایپ دونوں نے جواب دینا بند کر دیا۔ نتیجتاً ہزاروں صارفین کو ٹکٹ کنفرم کرنے میں دشواری پیش آئی۔

ابتدائی طور پر خیال کیا گیا کہ پورا سسٹم کریش ہوگیا ہے لیکن آئی آر سی ٹی سی نے بعد میں وضاحت دی کہ پلیٹ فارم دراصل بند نہیں ہوا تھا بلکہ شدید ٹریفک کے دباؤ کی وجہ سے عارضی تکنیکی رکاوٹ پیدا ہوئی تھی۔ کمپنی کے مطابق، تتکال بُکنگ کے وقت لاکھوں صارفین بیک وقت لاگ اِن ہوئے جس کے سبب سرورز اوورلوڈ ہو گئے۔ دوپہر تک ویب سائٹ اور موبائل ایپ دونوں مکمل طور پر بحال کر دی گئیں۔

رپورٹ کے مطابق، صرف ایک گھنٹے کے دوران پانچ ہزار سے زائد صارفین نے شکایت درج کرائی کہ وہ نہ تو لاگ اِن کر پا رہے ہیں اور نہ ہی بکنگ یا کینسلیشن کا عمل مکمل ہو رہا ہے۔ کئی مسافروں نے ایکس (سابقہ ٹوئٹر) پر اپنی مایوسی ظاہر کرتے ہوئے لکھا کہ ہر سال تہواروں کے موسم میں یہی مسئلہ پیش آتا ہے اور ریلوے انتظامیہ کو اپنی سرور صلاحیت بڑھانی چاہیے۔