ہندوستانی تیز گیندباز محمد سمیع کو ملی جان سے مارنے کی دھمکی، کرائم برانچ نے شروع کی تحقیقات

ہندوستان کے مشہور تیز گیندباز محمد سمیع کو جان سے مارنے کی دھمکی دی گئی ہے۔ دھمکی میں کہا گیا ہے کہ اگر ایک کروڑ روپے ادا نہ کیے گئے تو انھیں جان سے مار دیا جائے گا۔ دھمکی ای میل کے ذریعہ دی گئی ہے، جس کی تحقیقات امروہہ کرائم برانچ کے ذریعہ شروع کر دی گئی ہے۔

محمد سمیع نے دھمکی ملنے پر امروہہ پولیس کو تفصیلی جانکاری دی۔ انھوں نے بتایا کہ پہلے ایک ای میل گزشتہ کل 4 مئی کی شام کو آیا تھا۔ اس کے بعد دوسرا ای میل آج یعنی 5 مئی کی صبح آیا ہے۔ محمد سمیع کے بھائی محمد حسیب نے پولیس کو اس سلسلے میں تحریری طور پر مکمل جانکاری فراہم کر دی ہے۔ امروہہ پولیس میں شکایت درج کیے جانے کے ساتھ ہی کرائم برانچ کی ٹیم جانچ میں مصروف ہو گئی ہے۔

پولیس کو ملی شکایت کے بعد کرناٹک سے پربھاکر نامی شخص نے محمد سمیع کو ایک ای امیل بھیجا ہے، جس میں ایک کروڑ روپے نہ دینے پر جان سے مار دینے کی دھمکی دی گئی ہے۔ پولیس نے اس معاملے میں تحقیقات شروع کر دی ہے۔

قابل ذکر ہے کہ محمد سمیع اس وقت آئی پی ایل میں مصروف ہیں۔ وہ سنرائزرس حیدر آباد ٹیم کا حصہ ہیں۔ اس آئی پی ایل میں ان کی کارکردگی کچھ خاص نہیں رہی ہے، اور حیدر آباد کی کارکردگی بھی انتہائی مایوس کن رہی ہے۔ حیدر آباد نے اب تک 10 میچ کھیلا ہے، جن میں 7 میچوں میں شکست کا سامنا کرنا پڑا ہے۔