گجرات: فضائیہ کا طیارہ حادثہ کا شکار، پائلٹ کی موت

گجرات کے کَچھ علاقہ میں ہندوستانی فضائیہ کا جیگوار طیارہ حادثہ کا شکار ہو گیا ہے۔ حادثے میں پائلٹ سنجے چوہان کی موت ہو گئی ہے۔ بتایا جا رہا ہے کہ جیگوار طیارے نے معمول کے مطابق جام نگر سے صبح 10.30 بجے تربیتی پرواز بھری تھی۔ اسی دوران اچانک کَچھ کے مندرا میں وہ حادثے کا شکار ہو گیا۔ واقعہ کی جانچ کا حکم صادر کر دیا گیا ہے۔

یہ کوئی پہلی بار نہیں ہے جب جیگوار طیارہ حادثے کا شکار ہوا ہے اس سے قبل بھی جیگوار طیارے کئی مرتبہ گر کر تباہ ہو چکے ہیں۔ جیگوار ایک جنگی طیارہ ہے جس میں کئی خصوصیات ہیں۔ جیگوار دشمن کی سرحد کے اندر تک جاکر حملہ کر سکتا ہے اور آسانی سے دشمن کے ایئربیس کو نشانہ بنا سکتا ہے۔