4 نئی وندے بھارت ٹرینوں کا افتتاح، پی ایم مودی نے دکھائی ہری جھنڈی

ملک کے اہم تہواروں کے موقع پر مسافروں کی بھیڑ کے سامنے ٹرینوں کی قلت کی وجہ سے اکثر لوگ خاندان کے ساتھ خوشیاں منانے سے محروم رہ جاتے ہیں اس کی تازہ مثال حالیہ دیوالی اور چھٹھ تہواروں میں دیکھا گیا جب ریلوے اسٹیشنوں پر مسافروں کی بھیڑ کی وجہ سے پیر رکھنے کی جگہ نہیں تھی۔ اس صوتحال میں ملک کو 4 نئی وندے بھارت نصیب ہوئی ہیں جس کے بعد امید کی جاسکتی ہے کہ مسافروں کو کچھ آسانی ہوگی۔

 اس اثناء میں آج 4 نئی وندے بھارت ٹرینوں کو پی ایم مودی نے ہری جھنڈی دکھائی ہے۔ وارانسی ریلوے اسٹیشن پرمنعقد تقریب کے دوران پی ایم مودی نے وارانسی- کھجوراہو، لکھنو-سہارنپور، فیروز پور- دہلی اور ایرنا کولم- بنگلور روٹس پر چلنے والی ان ٹرینوں کا افتتاح کیا۔ اس موقع پر ریلوے کے عملے اور سیکورٹی اہلکار بھی موجود تھے۔

تقریب کو خطاب کرتے ہوئے پی ایم مودی نے کہا کہ بنیادی ڈھانچہ دنیا بھر کے ترقی یافتہ ممالک میں اقتصادی ترقی کا ایک بڑا محرک رہا ہے۔ ہوائی اڈے، وندے بھارت ٹرینیں، یہ سب ترقی سے منسلک ہیں۔ انہوں نے مزید کہا کہ غیر ملکی مسافر بھی اب وندے بھارت کودیکھ کر حیران ہوتے ہیں۔ انہوں نے کہا کہ یہ ٹرینیں سنگ میل ثابت ہوں گی۔

واضح رہے کہ کاشی آنے والے سیاح اور عقیدت مند کھجوراہو جانا چاہتے ہیں۔ کاشی سے کھجوراہو جانے والے سیاحوں اور عقیدت مندوں کے لیے یہ ٹرین مذہبی سیاحت کے ساتھ ساتھ ماحولیاتی سیاحت کے لیے بھی موزوں ثابت ہوگی۔ کھجوراہو سے پنا نیشنل پارک (ٹائیگر ریزرو) صرف چند کلومیٹر کے فاصلے پر ہے ۔ کھجوراہو اور ٹائیگر ریزرو دیکھنے کے لیے لاکھوں کی تعداد میں غیر ملکی سیاح آتے ہیں۔ اب انہیں کاشی آنے کے لیے براہ راست وندے بھارت ٹرین دستیاب ہو جائے گی۔

وارانسی- کھجوراہو وندے بھارت ایکسپریس کی براہ راست کنیکٹیویٹی فی الحال یہاں چلنے والی خصوصی ٹرینوں کے مقابلے میں تقریباً 2 گھنٹے 40 منٹ کا وقت بچائے گی۔ بنارس- کھجوراہو وندے بھارت ایکسپریس بھارت کے مذہبی سیاحتی اور ثقافتی مقامات وارانسی، پریاگ راج، چترکوٹ اور کھجوراہوکو جوڑے گی۔